معروف صحافی اور تجزیہ کار جاوید چوہدری نے پاکستان میں بجلی کے مسئلے کی ایک بڑی وجہ موبائل فون چارجرز کو قرار دیتے ہوئے کہا ہے کہ ملک میں توانائی کے بحران کی ایک اہم وجہ گھروں میں موبائل چارجرز کا مسلسل استعمال ہے۔
ان کا کہنا تھا کہ پاکستان میں تقریباً 25 کروڑ کی آبادی میں سے 18 کروڑ لوگ موبائل فون استعمال کر رہے ہیں اور روزانہ اپنے موبائل فون چارج کرتے ہیں۔ ان کے مطابق اگر ہر شخص اوسطاً آدھا یونٹ بجلی بھی موبائل چارجنگ پر خرچ کرے تو مجموعی طور پر روزانہ 9 کروڑ یونٹس کا بوجھ بنتا ہے۔
چلو جی۔ جاوید چوہدری صاحب فرماتے ہیں کہ پاکستان میں بجلی کے مسئلے کا ذمہ دار موبائل فون کے چارجر ہیں۔ 😂😂
ان کو کس عقلمند انسان نے یہ بتایا ہے؟ 🤦 pic.twitter.com/e0tKSzXbKB
— Maleeha Hashmey (@MaleehaHashmey) May 3, 2026
جاوید چوہدری کا کہنا تھا کہ جب پاکستان میں موبائل فون کے استعمال کی اجازت دی گئی تھی تو اس پہلو پر غور نہیں کیا گیا کہ اس کے نتیجے میں بجلی کی کھپت میں اضافہ ہوگا۔ انہوں نے یہ بھی کہا کہ گھروں میں چارجر اکثر ساکٹ میں لگے رہتے ہیں جس سے مسلسل بجلی کا استعمال جاری رہتا ہے۔
ان کے مطابق اگر ایک گھر میں تمام چارجرز کی موجودگی اور غیر ضروری استعمال کا جائزہ لیا جائے تو بجلی کے میٹر پر اس کا واضح اثر دیکھا جا سکتا ہے جبکہ چارجرز نکالنے سے کھپت میں کمی محسوس ہوتی ہے۔
یہ بھی پڑھیں: پیداواری صلاحیت کے باوجود پاکستان میں بجلی کی شدید کمی برقرار
سوشل میڈیا پر صارفین نے جاوید چوہدری کے بیان پر شدید ردِعمل دیتے ہوئے ان کا مذاق اڑایا اور کہا کہ موبائل فون چارجرز کو بجلی کے بحران کی بڑی وجہ قرار دینا غیر منطقی اور حقیقت سے دور ہے۔
کئی صارفین نے اس مؤقف کو مسترد کرتے ہوئے کہا کہ اس نوعیت کے دعوے سائنسی اور تکنیکی بنیادوں سے عاری ہیں اور بجلی کے مجموعی بحران کی وجوہات کہیں زیادہ پیچیدہ اور وسیع ہیں۔ بعض صارفین نے یہ بھی تبصرہ کیا کہ بغیر درست معلومات کے اس طرح کے بیانات عوام میں غلط فہمیاں پیدا کرتے ہیں۔
