بھارتی فلم انڈسٹری کے معروف پروڈیوسر آر بی چودھری ایک افسوسناک ٹریفک حادثے میں ہلاک ہو گئے، جس کے بعد جنوبی بھارتی فلم انڈسٹری میں غم کی لہر دوڑ گئی ہے۔
میڈیا رپورٹس کے مطابق آر بی چودھری 5 مئی 2026 کو ریاست راجستھان میں ایک شاہراہ پر پیش آنے والے حادثے میں جان کی بازی ہار گئے۔ وہ ایک خاندانی شادی میں شرکت کے لیے لیلامبا گاؤں گئے تھے اور تقریب کے بعد واپس آ رہے تھے۔
یہ بھی پڑھیے: بالی ووڈ اداکارہ کا گلیمر کی دنیا کو خیرباد کہہ کر مذہب کی طرف حیران کن سفر
حادثہ بیوار کے قریب جونتھا گاؤں کے علاقے میں اس وقت پیش آیا جب ان کی گاڑی اچانک سڑک پر آنے والے مویشیوں سے بچنے کی کوشش میں بے قابو ہو کر سڑک کنارے رکاوٹ سے ٹکرا گئی۔ تصادم اس قدر شدید تھا کہ گاڑی کا اگلا حصہ بری طرح تباہ ہو گیا۔
رپورٹس کے مطابق آر بی چودھری موقع پر ہی دم توڑ گئے، جبکہ ان کے داماد اور ڈرائیور شدید زخمی ہوئے جنہیں فوری طور پر جودھپور کے اسپتال منتقل کر دیا گیا۔
پولیس نے موقع پر پہنچ کر لاش کو پوسٹ مارٹم کے لیے منتقل کیا، جبکہ ان کی میت 6 مئی کو چنئی منتقل کیے جانے کی توقع ہے جہاں آخری رسومات ادا کی جائیں گی۔
یہ بھی پڑھیے: ’میں نے سب کھو دیا تھا‘، بالی ووڈ اداکار عامر خان کا چونکا دینے والا انکشاف
ان کی وفات پر بھارتی فلم انڈسٹری کی نمایاں شخصیات رجنی کانت، کمل ہاسن اور چرنجیوی سمیت متعدد فنکاروں نے گہرے دکھ اور افسوس کا اظہار کیا ہے۔ آر بی چودھری اپنے پیچھے بیٹوں جیوا اور جیتھن رمیش سمیت اہلِ خانہ کو سوگوار چھوڑ گئے ہیں۔
