پاکستان انٹرنیشنل ایئرلائن (پی آئی اے) نے سلطنتِ عمان سے اسلام آباد، لاہور اور ملتان کے لیے اپنی پروازیں دوبارہ بحال کرنے کا اعلان کردیا ہے۔
عمان میں پاکستانی سفارتخانے کی جانب سے جاری بیان میں کہا گیا ہے کہ پی آئی اے کی پروازوں کی بحالی 13 مئی 2026 سے مؤثر ہوگی۔
اس اقدام سے عمان میں مقیم پاکستانی برادری کو سفری سہولت میسر آئے گی اور پاکستان و عمان کے درمیان فضائی رابطوں کو مزید مضبوط بنانے میں مدد ملے گی۔
یہ بھی پڑھیے: پاکستان اور عمان کے درمیان توانائی تعاون کو مزید وسعت دینے پر اتفاق
اس سے قبل پی آئی اے کا متعدد ممالک کے لیے پروازیں معطل کرنے کا فیصلہ ایسے وقت میں سامنے آیا تھا جب جیٹ فیول کی قیمتیں 85 سے 90 ڈالر فی بیرل سے بڑھ کر 150 سے 200 ڈالر فی بیرل تک پہنچ گئیں، جو فضائی صنعت کے لیے بڑا مالی دھچکا ثابت ہوا کیونکہ ایندھن آپریٹنگ اخراجات کا تقریباً ایک چوتھائی حصہ ہوتا ہے۔
ایندھن کی قیمتوں میں اضافے کے پیش نظر طلبا، بینکاروں، بزرگ شہریوں، صحافیوں، ریٹائرڈ فوجی اہلکاروں اور ایئرپورٹس سیکیورٹی فورس کے ارکان کو دی جانے والی رعایتیں ختم کرنے کا بھی اعلان کیا تھا۔
یہ پیش رفت ایسے وقت میں سامنے آئی جب امریکا-ایران جنگ کے باعث آبنائے ہرمز کے ذریعے تیل، گیس اور کارگو کی ترسیل شدید متاثر ہوئی، جبکہ دنیا کی توانائی سپلائی کا تقریباً پانچواں حصہ اسی گزرگاہ کے ذریعے منتقل کیا جاتا ہے۔
