اسلام آباد ٹریفک پولیس کی جانب سے معرکہ حق بنیان مرصوص کی تقریبات جاری ہیں، اور اس دوران شہریوں میں پرنٹ شدہ شرٹس اور کیپس تقسیم کی جارہی ہیں۔
شہریوں کی جانب سے افواج پاکستان کی دلیری اور بہادری کو بھرپور خراج تحسین پیش کیا جارہا ہے۔
مزید پڑھیں: معرکہ حق کی سالگرہ، اسلام آباد کی فضاؤں میں پاک فضائیہ کا شاندار فلائی پاسٹ
چیف ٹریفک آفیسر اسلام آباد محمد سرفراز ورک نے کہا ہے کہ بارڈر پر تعینات پاک فوج کے جوان ہمارے اصل محافظ ہیں اور انہی کی قربانیوں کی بدولت ملک محفوظ ہے۔
وی نیوز سے گفتگو کرتے ہوئے انہوں نے کہاکہ سیکیورٹی کے لیے کھڑے ہونا اور جان کا نذرانہ پیش کرنا ایک عظیم جذبہ ہے، جس پر وہ پاک فوج کے جوانوں کو خراجِ تحسین پیش کرتے ہیں۔
بارڈر پر تعینات پاک فوج کے جوان ہمارے اصل محافظ ہیں اور انہی کی قربانیوں کی بدولت ملک محفوظ ہے۔معرکۂ حق میں ہم نے بھارت کو شکست دی۔ یہ ایک ایسا ٹرننگ پوائنٹ تھا جس کے بعد قوم متحد ہوئی۔ ہم مسلم اُمہ کے لیڈر کے طور پر نہ صرف ابھرے بلکہ اب دنیا کے فیصلے پاکستان میں ہو رہے ہیں ، چیف… pic.twitter.com/4KWEaXyGmG
— WE News (@WENewsPk) May 9, 2026
ان کے مطابق قوم کو چاہیے کہ وہ اپنے محافظوں کی بھرپور حمایت کرے کیونکہ انہی کی وجہ سے ہم محفوظ زندگی گزار رہے ہیں۔
سرفراز ورک نے کہا کہ پاکستان نے گزشتہ برس ایک بڑی فوجی طاقت کے خلاف کامیابی حاصل کی اور دشمن کے طیارے گرائے، جو ایک غیر معمولی واقعہ ہے۔ ان کے مطابق اس کامیابی نے پاکستان کی عسکری برتری کو دنیا کے سامنے واضح کیا ہے۔
انہوں نے مزید کہا کہ جذبہ حب الوطنی ہر شہری کے دل میں ہونا چاہیے اور اسے صرف محسوس کرنے کے بجائے مختلف سرگرمیوں کے ذریعے ظاہر بھی کیا جانا چاہیے۔
اسلام آباد میں معرکہ حق کی تقریبات کے حوالے سے گفتگو کرتے ہوئے انہوں نے کہا کہ یہ ایک قومی دن ہے جس میں ہر طبقے کو شامل ہو کر حصہ لینا چاہیے۔ ان کے مطابق اسلام آباد ٹریفک پولیس، اسلام آباد پولیس کے ساتھ مل کر اس موقع کو بھرپور انداز میں منا رہی ہے۔
انہوں نے بتایا کہ تقریبات کی تیاری سیمینارز سے شروع کی گئی، جبکہ شہر بھر میں فلیکسز، ویڈیوز اور آگاہی سرگرمیاں جاری ہیں۔
مزید پڑھیں: واشنگٹن میں معرکہ حق کی پہلی سالگرہ: ’ہم ہیں بنیان مرصوص‘ کے نعروں سے پاکستانی سفارت خانہ گونج اٹھا
انہوں نے بتایا کہ شہریوں میں شرٹس اور بیجز بھی تقسیم کیے جا رہے ہیں، جبکہ متعدد شہری خود بھی جھنڈے اور بیجز لے کر اس مہم کا حصہ بن رہے ہیں۔
چیف ٹریفک آفیسر نے کہا کہ قومی پروگرام کو کل لائیو دکھایا جائے گا تاکہ شہری اسے براہِ راست دیکھ سکیں، اور اسلام آباد پولیس اسے شایانِ شان طریقے سے منانے کے لیے پرعزم ہے۔
