واٹر اینڈ پاور ڈیولپمنٹ اتھارٹی (واپڈا) نے اتوار کی رات ملک میں پن بجلی کی ریکارڈ پیداوار کا دعویٰ کیا ہے۔ واپڈا حکام کے مطابق انڈس ریور سسٹم اتھارٹی (ارسا) کی جانب سے پانی کے اخراج میں اضافے کے بعد بجلی کی پیداوار میں یہ نمایاں بہتری دیکھی گئی۔
ارسا کی جانب سے پانی کی طلب بڑھنے پر واپڈا کے ہائیڈل پاور اسٹیشنز نے پیک آورز کے دوران نیشنل گرڈ کو 6,118 میگاواٹ بجلی فراہم کی ہے۔ جاری کردہ تفصیلات کے مطابق تربیلا ہائیڈل پاور اسٹیشن نے نیشنل گرڈ میں سب سے زیادہ 2,332 میگاواٹ بجلی کا حصہ ڈالا۔
یہ بھی پڑھیں: وفاقی آئینی عدالت نے ڈاکٹر طارق میمن کے تبادلے پر واپڈا کو نوٹس جاری کردیا
اس کے علاوہ تربیلا فورتھ ایکسٹینشن ہائیڈرو پاور پروجیکٹ سے 1,095 میگاواٹ بجلی حاصل کی گئی۔ غازی بروتھا سے 1,160 میگاواٹ اور منگلا ڈیم سے 930 میگاواٹ بجلی سسٹم میں شامل کی گئی۔
With increased indent by IRSA, WAPDA hydel gen. surpassed 6000MW, as its Hydel Power Stations provided 6118MW to National Grid during peak hours. WAPDA's hydel power, being the most affordable clean & green energy in the National Grid, subsidises entire Energy Sector in Pakistan. pic.twitter.com/HVRvaY1ASR
— WAPDA (@wapda_pr) May 18, 2026
دیگر اسٹیشنز میں وارسک سے 135 میگاواٹ اور چشمہ ہائیڈل پاور اسٹیشن سے 101 میگاواٹ بجلی نیشنل گرڈ کو فراہم کی گئی۔ باقی ماندہ 365 میگاواٹ بجلی واپڈا کے دیگر چھوٹے اور درمیانے درجے کے اسٹیشنز سے پیدا کی گئی۔
یہ بھی پڑھیں: بجلی کے نظام میں بہتری: پن بجلی کی پیداوار 6 ہزار میگاواٹ تک پہنچ گئی
وزارتِ آبی وسائل کے اعداد و شمار کے مطابق واپڈا کے تمام پن بجلی منصوبوں کی مجموعی پیداواری صلاحیت 9,459 میگاواٹ ہے۔ واپڈا نے بتایا کہ سال 2025 میں اس کے 22 ہائیڈل پاور اسٹیشنز نے ریکارڈ 33.12 ارب یونٹ بجلی پیدا کی تھی۔
یہ پیداوار سسٹم میں پیدا ہونے والی کل بجلی کا تقریباً 30 فیصد بنتی ہے۔ اسی طرح مالی سال 2023-24 میں واپڈا نے مجموعی طور پر 34.436 ارب یونٹ بجلی قومی گرڈ کو فراہم کی تھی، جو اس سے پچھلے مالی سال کے مقابلے میں 3.266 ارب یونٹ زیادہ تھی۔
