اسماعیلی برادری کے روحانی پیشوا شہزادہ رحیم الحسینی آغا خان نے پاکستان میں اسماعیلی برادری پر زور دیا ہے کہ وہ ‘صراطِ مستقیم’ پر ثابت قدم رہے، اتحاد اور پُرامن بقائے باہمی کو فروغ دے، زندگی بھر تعلیم حاصل کرے اور کاروباری و پیشہ ورانہ زندگی میں اعلیٰ اخلاقی معیار برقرار رکھے۔
یہ بھی پڑھیں: لزبن، اسماعیلی برادری کے 50ویں امام پرنس رحیم آغا خان پنجم تخت نشین ہوگئے
پرنس رحیم آغا خان پنجم نے اس بات پر بھی خصوصی زور دیا کہ ہمارا ایمان دین کے بنیادی عقائد توحید، حضرت محمد مصطفی صلی اللّٰہ علیہ وآلہ وسلم کی ختمِ نبوت اور قرآنِ مجید کو اللّٰہ تعالیٰ کی آخری وحی ماننے پر مبنی ہے۔
گلگت بلتستان کے دورے کے دوران اسماعیلی برادری کے اجتماعات سے خطاب کرتے ہوئے انہوں نے تعلیم، بھائی چارے، سماجی ہم آہنگی، ہمدردی اور اجتماعی ترقی کی اہمیت کو اجاگر کیا۔
انہوں نے برادری کے افراد کو نیکی کے راستے پر گامزن رہنے اور امن، برداشت، اخلاقی رویے اور ذمہ دار شہری ہونے کے ناطے انسانیت کی خدمت جاری رکھنے کی تلقین کی۔
اسماعیلی پیشوا نے تعلیم، خصوصاً لڑکیوں کی تعلیم، پر زور دیتے ہوئے کہا کہ سیکھنے کا عمل صرف رسمی تعلیم تک محدود نہیں ہونا چاہیے بلکہ پوری زندگی جاری رہنا چاہیے۔
یہ بھی پڑھیں: خدماتِ پاکستان کے اعتراف میں پرنس رحیم کے لیے ’نشان پاکستان‘ ایوارڈ
انہوں نے نوجوانوں کو جدید مہارتیں حاصل کرنے اور تیزی سے بدلتی دنیا کے چیلنجز کا مقابلہ کرنے کے لیے ہمہ وقت تیار رہنے کا مشورہ دیا۔
آخر میں پرنس رحیم آغا خان نے گلگت بلتستان کی مقامی انتظامیہ کا بھی شکریہ ادا کیا، جس نے ان کے اس دورے کے دوران بہترین معاونت، تعاون اور تمام تر انتظامات فراہم کیے۔
