پاکستان کے نائب وزیراعظم اور وزیر خارجہ سینیٹر اسحاق ڈار نے بنگلہ دیش کو اقوام متحدہ کی جنرل اسمبلی ( یو این جی اے) کے 81 ویں اجلاس کی تاریخی صدارت حاصل کرنے پر دلی مبارک باد پیش کی ہے۔ انہوں نے اس کامیابی کو خطے اور بنگلہ دیش کے لیے ایک اہم سفارتی سنگِ میل قرار دیا ہے۔
ڈاکٹر خلیل الرحمان کے لیے تہنیتی پیغام
بدھ کو سماجی رابطے کی ویب سائٹ ’ایکس‘ پر جاری اپنے ایک خصوصی تہنیتی پیغام میں سینیٹر اسحاق ڈار نے بنگلہ دیش کے وزیر خارجہ ڈاکٹر خلیل الرحمان کے لیے نیک خواہشات کا اظہار کیا۔
Heartiest felicitations to my dear brother, H.E. Dr. Khalilur Rahman, Foreign Minister of Bangladesh on his election as President of the 81st Session of the UN General Assembly.
Having had closely engaged with him, I am confident that his vast diplomatic experience and steadfast…
— Ishaq Dar (@MIshaqDar50) June 2, 2026
انہوں نے لکھا کہ ’میرے عزیز بھائی ڈاکٹر خلیل الرحمان، وزیر خارجہ بنگلہ دیش کو اقوام متحدہ کی جنرل اسمبلی کے 81 ویں اجلاس کی صدارت کے لیے منتخب ہونے پر دلی مبارکباد پیش کرتا ہوں‘۔
بنگلہ دیشی وزیر خارجہ کے سفارتی تجربے پر اعتماد
نائب وزیراعظم اسحاق ڈار نے بنگلہ دیشی وزیر خارجہ کی صلاحیتوں کو سراہتے ہوئے کہا کہ ان کے ساتھ قریبی رابطوں اور گہرے تعلقات کی بنیاد پر مجھے پورا یقین ہے کہ ان کا وسیع سفارتی تجربہ اور کثیرالجہتی عزم اقوام متحدہ کی جنرل اسمبلی کو ایک نمایاں اور بہترین رہنمائی فراہم کرے گا۔ ان کی قیادت میں عالمی برادری کے مابین روابط کو مزید فروغ ملے گا۔
عالمی امن اور مشترکہ ترجیحات کا عزم
اپنے پیغام کے آخر میں سینیٹر اسحاق ڈار نے مستقبل کے سفارتی عزائم کا ذکر کرتے ہوئے لکھا کہ ’میں اقوام متحدہ میں اپنی شمولیت جاری رکھنے اور کثیر الجہتی تعاون کو مضبوط کرنے، مشترکہ عالمی ترجیحات کو آگے بڑھانے اور مکالمہ، امن اور پائیدار ترقی کو فروغ دینے کے لیے مل کر کام کرنے کا منتظر ہوں‘۔
یہ بھی پڑھیں:پاکستان اور بنگلہ دیش کے درمیان تجارت میں 20 فیصد اضافہ، حجم ایک ارب ڈالر تک پہنچ گیا
انہوں نے بنگلہ دیشی ہم منصب کے لیے دعا کرتے ہوئے کہا کہ وہ اس اہم ترین عالمی ذمہ داری اور کوشش میں ان کی کامیابی کے لیے دعا گو ہیں۔
