سعودی وزارت حج وعمرہ نے عازمین حج کوکہا ہے کہ طواف کے وقت حجراسود کو بوسہ دینے کے لیے مقررہ ضوابط کا خیال رکھیں۔
سعودی خبررساں ادارے کے مطابق وزارت حج وعمرہ کی جانب سے جاری بیان میں دنیا بھرسے آنے والے عازمین حج سے اپیل کی گئی ہے کہ وہ ازدحام کے اوقات میں حجراسود سے دور رہتے ہوئے بھی اشارہ سے تکبیر کہہ سکتے ہیں۔
طواف کے دوران حجر اسود کے قریب جانے اور اسے بوسہ دینے کے لیے بعض امور کا خیال رکھنا ضروری ہے تاکہ کسی قسم کی دشواری کا سامنا نہ کرنا پڑے۔ حجر اسود کا بوسہ دینے یا اس کے قریب جانے کے لیے ایسے وقت کا انتخاب کریں جب ازدحام زیادہ نہ ہو۔
یہ بھی کہا گیا ہے کہ کعبہ شریف کے ساتھ موجود سیکیورٹی اہلکاروں کی ہدایات پرعمل کریں۔ اگرحجراسود کے قریب جانا ممکن نہ ہو توسنت نبوی پرعمل کرتے ہوئے دور رہتے ہوئے ہاتھ کے اشارے سے یہ عمل کیا جاسکتا ہے۔
واضح رہے حج سیزن میں دنیا بھرسے لاکھوں کی تعداد میں عازمین حج ارض مقدس آتے ہیں ایسے میں کعبہ شریف کا طواف کے دوران شدید ازدحام ہوتا ہے۔
