بھارت کی ریاست آسام کے شہر جورہاٹ میں بھارتی فضائیہ کا ٹرانسپورٹ طیارہ AN-32 لینڈنگ کے دوران حادثے کا شکار ہوگیا، حادثے میں فضائیہ کے 5 جوان ہلاک ہوگئے جبکہ واقعے کی وجوہات جاننے کے لیے تحقیقات شروع کر دی گئی ہیں۔
بھارتی فضائیہ کا AN-32 ٹرانسپورٹ طیارہ آسام کے جورہاٹ ایئر فورس اسٹیشن پر لینڈنگ کے دوران گر کر تباہ ہوگیا۔ حادثے کے بعد طیارے میں آگ بھڑک اٹھی جس پر قابو پانے کے لیے امدادی ٹیمیں فوری طور پر موقع پر پہنچ گئیں۔
#BREAKING: Today an AN-32 of Indian Air Force has met with an accident in Jorhat, Assam. More details awaited. pic.twitter.com/7ThSJh5Lm2
— Aditya Raj Kaul (@AdityaRajKaul) June 13, 2026
بھارتی فضائیہ نے واقعے کی تصدیق کرتے ہوئے بتایا ہے کہ حادثے کی وجوہات تاحال معلوم نہیں ہو سکیں اور معاملے کی مکمل تحقیقات شروع کر دی گئی ہیں۔
حکام کے مطابق حادثے میں فضائیہ کے 5 اہلکار ہلاک ہوئے ہیں، جبکہ جائے حادثہ پر ریسکیو اور تحقیقاتی کارروائیاں جاری ہیں۔
یہ بھی پڑھیں:بھارتی فضائیہ کو بڑا دھچکا: تیجس جیٹ کے تیسرے حادثے کے بعد طیارے گراؤنڈ کردیے
آسام کے وزیراعلیٰ ہیمنت بسوا سرما نے بھی واقعے پر افسوس کا اظہار کرتے ہوئے کہا ہے کہ حکام سے معلومات حاصل کی جا رہی ہیں اور صورتحال پر نظر رکھی جا رہی ہے۔
AN-32 طیارہ بھارتی فضائیہ کا ایک اہم فوجی ٹرانسپورٹ جہاز ہے جو دشوار گزار علاقوں، بلند پہاڑی مقامات اور مشکل موسمی حالات میں سامان اور اہلکاروں کی منتقلی کے لیے استعمال کیا جاتا ہے۔
یہ حادثہ ایسے وقت میں پیش آیا ہے جب چند ماہ قبل بھی آسام میں بھارتی فضائیہ کا ایک جنگی طیارہ گر کر تباہ ہوا تھا، جس میں 2 پائلٹس ہلاک ہوئے تھے۔
