نائب وزیراعظم و وزیر خارجہ سینیٹر اسحاق ڈار نے جمعہ اور ہفتہ کی درمیانی شب مصر کے وزیر خارجہ بدر عبدالعاطی سے ٹیلیفونک رابطہ کیا، جس میں خطے کی تازہ صورتحال اور جاری سفارتی کوششوں پر تبادلہ خیال کیا گیا۔
وزارتِ خارجہ کی جانب سے جاری اعلامیےکے مطابق دونوں رہنماؤں نے علاقائی پیش رفت کا جائزہ لیا اور امن و استحکام کے فروغ کے لیے جاری سفارتی اقدامات میں مثبت پیش رفت کا خیرمقدم کیا۔
یہ بھی پڑھیں:اسحاق ڈار اور مارکو روبیو ملاقات: امریکی وزیر خارجہ کا علاقائی امن کے لیے پاکستان کی سفارتی کوششوں کا اعتراف
اسحاق ڈار اور بدر عبدالعاطی نے اس امید کا اظہار کیا کہ امریکا اور ایران کے درمیان جاری سفارتی رابطوں کے جلد اور تعمیری نتائج سامنے آئیں گے، جو خطے میں دیرپا امن اور استحکام کے قیام میں مددگار ثابت ہوں گے۔
گفتگو کے دوران دونوں وزرائے خارجہ نے باہمی دلچسپی کے امور پر قریبی رابطے برقرار رکھنے اور مشاورت کا سلسلہ جاری رکھنے پر بھی اتفاق کیا۔
وزارتِ خارجہ کے مطابق یہ رابطہ پاکستان اور مصر کے درمیان علاقائی امن، استحکام اور سفارتی تعاون کے فروغ کے عزم کی عکاسی کرتا ہے۔
