وفاقی وزیرِ خزانہ محمد اورنگزیب نے کہا ہے کہ پاکستان آئندہ مالی سال میں عالمی مالیاتی منڈیوں سے مزید سرمایہ حاصل کرنے کے لیے نئے بانڈز جاری کرنے پر غور کر رہا ہے، جبکہ ایران سے متعلق حالیہ پیشرفت کے بعد ملکی معیشت اور بجٹ اہداف میں بہتری کی امید بھی پیدا ہوئی ہے۔
مزید پڑھیں: پیٹرولیم مصنوعات پر سیلز ٹیکس لگنے کی بات درست نہیں، وفاقی وزیرِ خزانہ محمد اورنگزیب
رائٹرز کو دیے گئے انٹرویو میں وزیر خزانہ نے بتایا کہ حکومت بیرونی قرضوں کے ڈھانچے کو بہتر بنانے کے لیے پانڈا بانڈز، یورو بانڈز اور دیگر تجارتی مالیاتی ذرائع سے استفادہ کرنا چاہتی ہے، تاہم مجموعی بیرونی قرضوں میں اضافہ نہیں کیا جائے گا۔
انہوں نے کہا کہ اگرچہ ایران سے متعلق کشیدگی میں کمی اور ممکنہ معاہدے کے بعد معاشی صورتحال بہتر ہونے کے امکانات موجود ہیں، تاہم اس وقت حال ہی میں پیش کیے گئے بجٹ کے اہداف میں کوئی تبدیلی نہیں کی جا رہی۔ حکومت نے مالی سال 2026-27 کے لیے 4 فیصد معاشی شرح نمو اور 8.2 فیصد مہنگائی کا ہدف مقرر کیا ہے۔
وزیر خزانہ کے مطابق پاکستان کو ایک ارب ڈالر کے پانڈا بانڈز کے اجرا کی منظوری مل چکی ہے، جبکہ آئندہ مالی سال کے دوران کمرشل اور یورو بانڈ مارکیٹوں سے قریباً 2.82 ارب ڈالر حاصل کرنے کا منصوبہ ہے۔
محمد اورنگزیب نے کہا کہ خطے میں استحکام، تیل کی قیمتوں میں ممکنہ کمی اور تجارتی سرگرمیوں کی بحالی سے پاکستان کی معاشی کارکردگی پر مثبت اثرات مرتب ہو سکتے ہیں، تاہم حکومت صورتحال کا مسلسل جائزہ لے رہی ہے۔
