صدرِ مملکت آصف علی زرداری نے پارلیمنٹ سے پاس ہونے والے 4 اہم بلوں کی باضابطہ منظوری دے دی ہے۔ ان قوانین میں کیریج بائی ایئر (ترمیمی) بل 2026 اور پاکستان ایئرپورٹس اتھارٹی (ترمیمی) بل 2026 شامل ہیں۔
ایوانِ صدر کے مطابق ان ترمیمی بلوں کا مقصد متعلقہ شعبوں کی کارکردگی کو مزید بہتر اور وقت کے تقاضوں کے مطابق بنانا ہے۔
یہ بھی پڑھیں: صدر مملکت نے اسلام آباد لوکل گورنمنٹ ترمیمی آرڈیننس پر دستخط کردیے، گزٹ نوٹیفکیشن بھی جاری
اس کے علاوہ منظور کیے گئے دیگر قوانین میں مالی ذمہ داری اور قرضوں کی حدود کے تعین کا (ترمیمی) بل 2026 اور اقبال اکیڈمی (ترمیمی) بل 2026 بھی شامل ہیں۔
صدرِ مملکت کی جانب سے دستخط کیے جانے کے بعد یہ تمام بل اب فوری طور پر ملک بھر میں نافذ العمل ہو گئے ہیں۔ ان قوانین کی منظوری ملکی معیشت اور تعلیمی اداروں کی مضبوطی کے لیے انتہائی اہم تصور کی جارہی ہے۔
یہ بھی پڑھیں: فضل الرحمان کا دباؤ کارگر، صدر مملکت نے مدارس رجسٹریشن بل پر دستخط کردیے
ایک الگ اہم فیصلے میں صدرِ مملکت آصف علی زرداری نے وفاقی پبلک سروس کمیشن (ایف پی ایس سی) میں نئی تعیناتی کی بھی منظوری دی ہے۔
گریڈ 22 کی سینیئر افسر محترمہ عائشہ حمیرا چوہدری کو وفاقی پبلک سروس کمیشن کا رکن مقرر کر دیا گیا ہے۔ صدرِ مملکت نے یہ منظوری آئین کے تحت حاصل اختیارات کو بروئے کار لاتے ہوئے دی ہے۔
