بالی ووڈ کے معروف اداکار عامر خان نے اپنی شادی سے متعلق تفصیلات لیک ہونے پر ردِعمل دیتے ہوئے کہا ہے کہ آج کے دور میں مشہور شخصیات کی نجی زندگی محفوظ نہیں رہی۔
بین الاقوامی جریدے کو دیے گئے انٹرویو میں عامر خان نے بتایا کہ وہ گوری سپراٹ سے 5 جولائی کو ایک نہایت سادہ اور نجی تقریب میں شادی کریں گے۔ انہوں نے کہا کہ یہ شادی ایک ’سادہ رجسٹرڈ میرج‘ ہوگی جو گھر پر منعقد کی جائے گی جس میں صرف قریبی اہل خانہ اور چند قریبی دوست شریک ہوں گے۔
یہ بھی پڑھیں: کرن راؤ نے بالی ووڈ سپر اسٹار عامر خان سے طلاق کیوں لی؟
اداکار نے اپنی زندگی کے اس نئے باب کو خاص طور پر خوشگوار قرار دیا اور گوری کو ’ایک نعمت‘ کہا۔ ساتھ ہی انہوں نے شادی کی تفصیلات میں لوگوں کی غیر معمولی دلچسپی پر حیرت کا اظہار بھی کیا۔
انہوں نے کہا ’مجھے سمجھ نہیں آتی کہ (یہ اتنا ہنگامہ کیوں ہے)۔ مشہور شخصیات خاص طور پر کرکٹرز اور اداکاروں کی نجی زندگی میں بہت زیادہ دلچسپی لی جاتی ہے۔ لوگوں کو ہمارے کام میں دلچسپی ہونی چاہیے نہ کہ ذاتی زندگی میں۔ مجھے نہیں معلوم میری شادی کی معلومات کیسے لیک ہوئیں۔ آج کل کچھ بھی حد سے باہر نہیں رہا‘۔
یہ بھی پڑھیں: شراب نوشی کیوں شروع کی، عامر خان کا چونکا دینے والا انکشاف
واضح رہے کہ عامر خان اور گوری سپراٹ کی ملاقات تقریباً 25 سال قبل ہوئی تھی تاہم بعد میں دونوں کے راستے جدا ہو گئے تھے۔ برسوں بعد دونوں دوبارہ ایک دوسرے کے قریب آئے۔
عامر خان نے مارچ 2025 میں اپنی 60ویں سالگرہ کے موقع پر گوری سپراٹ کو میڈیا کے سامنے متعارف کرایا تھا جس کے بعد ان کے تعلق کی تصدیق ہوئی۔
یہ بھی پڑھیں: میں پہلے ہی گوری کے ساتھ شادی شدہ ہوں، عامر خان کا اعتراف
یہ عامر خان کی تیسری شادی ہوگی۔ اس سے قبل وہ رینا دتہ سے 1986 سے 2002 تک جبکہ فلم ساز کرن راؤ سے 2005 سے 2021 تک شادی کے بندھن میں رہے۔ دونوں سابقہ رشتوں سے ان کے تین بچے ہیں اور گوری سپراٹ کا بھی ایک بیٹا ہے۔
