وفاقی وزیر پیٹرولیم علی پرویز ملک نے کہا ہے کہ حکومت عالمی معاہدوں کی پاسداری کرتے ہوئے عوام کو ریلیف پہنچانے کے لیے اقدامات کر رہی ہے، جبکہ ایران سے سستا تیل اور گیس خریدنے کے امکانات کا بھی جائزہ لیا جا رہا ہے۔
یہ بھی پڑھیں:پیٹرولیم قیمتوں میں عوام کو ریلیف دینے کے لیے پرعزم ہیں، علی پرویز ملک
میڈیا رپورٹ کے مطابق وفاقی وزیر پیٹرولیم علی پرویز ملک نے کہا ہے کہ گزشتہ ہفتے عالمی منڈی میں قیمتوں میں کمی کے مقابلے میں حکومت نے عوام کو زیادہ ریلیف فراہم کیا اور وزیراعظم شہباز شریف نے فوری طور پر اس کا فائدہ عوام تک منتقل کیا۔
لاہور میں میڈیا سے گفتگو کرتے ہوئے علی پرویز ملک نے محرم الحرام کے دوران امن و امان کی صورتحال پر اطمینان کا اظہار کرتے ہوئے پاک فوج، وزیراعظم اور وزیراعلیٰ پنجاب کو خراج تحسین پیش کیا۔
انہوں نے کہا کہ خطے میں امن کی صورتحال بہتر ہوئی ہے اور ایران امریکا کشیدگی کے خاتمے کے بعد عالمی منڈی میں پیٹرولیم مصنوعات کی قیمتوں میں کمی دیکھی گئی ہے۔
وفاقی وزیر کا کہنا تھا کہ حکومت پیٹرولیم مصنوعات کی قیمتوں میں کمی کے معاملے پر مسلسل نظر رکھے ہوئے ہے اور عالمی سطح پر ہونے والی تبدیلیوں کا فائدہ عوام تک پہنچانے کے لیے اقدامات کیے جا رہے ہیں۔
یہ بھی پڑھیں:پیٹرولیم مصنوعات کی قیمتوں میں کمی کی خبر جلد آنے والی ہے، وفاقی وزیر علی پرویز ملک
علی پرویز ملک نے کہا کہ بعض عناصر پیٹرولیم مصنوعات کی قیمتوں کے حوالے سے عوام کو گمراہ کرنے کی کوشش کر رہے ہیں، تاہم حکومت بین الاقوامی ذمہ داریوں اور معاہدوں کو مدنظر رکھتے ہوئے فیصلے کرے گی۔
انہوں نے مزید کہا کہ ایران سے سستا تیل اور گیس خریدنے کے امکانات کا بھی جائزہ لیا جا رہا ہے تاکہ توانائی کے شعبے میں عوام کو مزید سہولت فراہم کی جا سکے۔
