خیبرپختونخوا کلچر اینڈ ٹورازم اتھارٹی کی جانب سے جاری کردہ اعداد و شمار کے مطابق ملک بھر سے ریکارڈ تعداد میں سیاحوں نے صوبے کے تفریحی مقامات کا رخ کیا ہے، جہاں گزشتہ 6 روز کے دوران 12 لاکھ سے زائد سیاح سیر و تفریح کے لیے پہنچے۔
یہ بھی پڑھیں: عیدالاضحی تعطیلات: خیبرپختونخوا کے سیاحتی مقامات پر ریکارڈ رش، 11 لاکھ سے زائد سیاحوں کی آمد
وزیراعلیٰ خیبرپختونخوا کے مشیر برائے سیاحت ملک عدیل اقبال نے سیاحوں کی اس کثیر آمد کا خیرمقدم کرتے ہوئے اسے صوبائی حکومت پر عوام کے اعتماد کا مظہر قرار دیا ہے۔
انہوں نے واضح کیا کہ بانی تحریک انصاف عمران خان اور وزیراعلیٰ خیبرپختونخوا سہیل آفریدی کے وژن کے تحت صوبے میں سیاحت کو فروغ دیا جا رہا ہے۔
جاری کردہ تفصیلات کے مطابق وادی سوات سیاحوں کی سب سے پسندیدہ آماجگاہ رہی جہاں سب سے زیادہ 5 لاکھ 33 ہزار سے زائد سیاح آئے۔ اس کے علاوہ ناران کاغان میں 2 لاکھ 72 ہزار سے زائد، وادی کمراٹ میں 2 لاکھ 51 ہزار 700 اور گلیات کے خوبصورت مقامات پر 2 لاکھ 31 ہزار سے زائد سیاحوں نے رخ کیا۔
یہ بھی پڑھیں: خیبرپختونخوا میں سیاحت کے فروغ کے لیے وزیراعلیٰ کا بڑا فیصلہ
مشیر سیاحت عدیل اقبال کا کہنا ہے کہ تمام متعلقہ اتھارٹیز، ڈسٹرکٹ گورنمنٹ اور ٹورازم پولیس سیاحوں کی سہولیات کے لیے مکمل طور پر متحرک ہیں تاکہ انہیں ہر ممکن سفری اور تفریحی سہولیات فراہم کی جا سکیں۔
