خیبرپختونخوا میں آسمانی بجلی گرنے کے 2 الگ الگ واقعات میں متعدد افراد متاثر ہوئے۔ ضلع لوئر دیر میں خواتین کے ایک مدرسے پر آسمانی بجلی گرنے سے 20 سے زیادہ طالبات زخمی ہوگئیں، جبکہ ضلع خیبر کی تحصیل لنڈی کوتل میں پیش آنے والے ایک اور واقعے میں 2 بچے جان کی بازی ہار گئے اور ایک ہی خاندان کے 2 افراد زخمی ہو گئے۔
لوئر دیر میں خواتین کے مدرسے پر آسمانی بجلی گرنے کے وقت مدرسے میں قریباً 250 طالبات موجود تھیں۔ حادثے کے نتیجے میں 20 سے زیادہ طالبات زخمی ہوئیں، جنہیں فوری طور پر طبی امداد فراہم کرنے کے بعد واڑی اسپتال منتقل کر دیا گیا۔
ادھر ضلع خیبر کی تحصیل لنڈی کوتل کے علاقے بازار زخہ خیل میں آسمانی بجلی ایک رہائشی مکان پر گری، جس کے نتیجے میں 2 بچے جاں بحق ہوگئے، جبکہ ایک ہی خاندان کے 3 افراد زخمی ہو گئے۔
پولیس کے مطابق آسمانی بجلی زالیب گل نامی شخص کے گھر پر گری، جس سے مکان کو بھی نقصان پہنچا۔
حکام کا کہنا ہے کہ حادثے میں زخمی ہونے والے تمام افراد کا تعلق اسی خاندان سے ہے۔
واقعے کے فوراً بعد مقامی افراد نے امدادی کارروائیاں شروع کیں اور زخمیوں کو علاج کے لیے قریبی اسپتال منتقل کیا۔ پولیس کے مطابق زخمیوں میں سے ایک شخص کی حالت تشویشناک بتائی جا رہی ہے۔
پولیس اور دیگر متعلقہ ادارے دونوں واقعات کی مزید تفصیلات اور نقصانات کا جائزہ لے رہے ہیں، جبکہ متاثرہ خاندان سے تعزیت اور ہمدردی کا اظہار بھی کیا جا رہا ہے۔
