بھارت کے غیر قانونی زیر قبضہ جموں و کشمیر کے ضلع پونچھ میں بھارتی فوج کی بڑھتی ہوئی عسکری سرگرمیوں اور بڑے پیمانے پر فرضی مشقوں کے بعد خدشات ظاہر کیے جا رہے ہیں کہ نئی دہلی کشمیر کی آزادی کی تحریک اور پاکستان کو بدنام کرنے کے لیے ایک اور مبینہ فالس فلیگ آپریشن کی تیاری کر رہا ہے۔
مزید پڑھیں:پہلگام واقعہ فالس فلیگ آپریشن تھا، بھارت تحقیقات سے بھاگ گیا: عطا تارڑ
کشمیر میڈیا سروس کے مطابق بھارتی فوج نے لائن آف کنٹرول اور پونچھ کے مختلف علاقوں میں مربوط فرضی مشقیں کیں، جن میں مبینہ دہشتگرد حملے اور ہنگامی ردعمل کی صورتحال کی مشق کی گئی۔
رپورٹ کے مطابق بھارتی فورسز نے اس کے ساتھ ساتھ علاقے میں اضافی نفری تعینات کی، نئے چیک پوسٹس قائم کیے، نگرانی کا نظام مزید سخت کیا اور مینڈھر، سرنکوٹ اور ملحقہ علاقوں میں بڑے پیمانے پر سرچ اور گشت کا سلسلہ بھی تیز کر دیا۔
بھارتی حکام نے ان اقدامات کی وجہ ممکنہ دراندازی سے متعلق خفیہ اطلاعات کو قرار دیا ہے، تاہم ان دعوؤں کے حق میں کوئی قابلِ تصدیق ثبوت پیش نہیں کیا گیا۔
تجزیہ کاروں کا کہنا ہے کہ بھارتی فوجی سرگرمیوں میں اچانک اضافہ اور کسی واضح شواہد کے بغیر مسلسل ممکنہ دہشتگردی کے خطرات کے دعوے مقبوضہ کشمیر میں خوف و ہراس کی فضا پیدا کرنے کی کوشش ہیں۔
ان کے مطابق ماضی میں بھی اس نوعیت کی مشقوں اور دعوؤں کے بعد نئی دہلی پر سیکیورٹی بحران کو بڑھا چڑھا کر پیش کرنے یا مبینہ فالس فلیگ کارروائیوں کے الزامات عائد ہوتے رہے ہیں، جن کا مقصد مقبوضہ کشمیر میں اپنی پالیسیوں اور ناکامیوں سے توجہ ہٹانا بتایا جاتا ہے۔
