صدر آصف علی زرداری اور وزیراعظم محمد شہباز شریف نے معروف سماجی کارکن اور انسان دوست شخصیت عبدالستار ایدھی کی دسویں برسی پر انہیں زبردست خراجِ عقیدت پیش کرتے ہوئے کہا ہے کہ عبدالستار ایدھی نہ صرف ایک عظیم انسان دوست شخصیت تھے بلکہ قوم کے لیے باعثِ فخر، قومی اثاثہ اور خدمتِ خلق کی لازوال علامت ہیں، جن کی فلاحی خدمات آنے والی نسلوں کے لیے مشعلِ راہ رہیں گی۔
صدر آصف علی زرداری نے عبدالستار ایدھی کی دسویں برسی پر اپنے پیغام میں کہا کہ عبدالستار ایدھی صرف ایک عظیم انسان دوست شخصیت ہی نہیں تھے بلکہ قومی وقار کی ایک دائمی علامت بھی تھے۔ انہوں نے کہا کہ ایدھی کی انتھک خدمات کے نتیجے میں قائم ہونے والے فلاحی ادارے آج بھی لاکھوں افراد کی خدمت کر رہے ہیں، جو ان کے بلند وژن اور بے مثال عزم کا زندہ ثبوت ہیں۔
صدر مملکت نے کہا کہ عبدالستار ایدھی کی میراث ہمدردی، خدمتِ خلق، خیرات اور انسانی وقار جیسی اقدار کو فروغ دینے کے لیے ہمیشہ مشعلِ راہ بنی رہے گی۔
"Abdul Sattar Edhi was not only a monumental humanitarian but also an enduring symbol of national pride. His tireless work built institutions that continue to serve millions, standing as a living testament to his profound vision. His legacy remains a beacon to uphold the values… pic.twitter.com/6M70VAPCxX
— The President of Pakistan (@PresOfPakistan) July 8, 2026
دوسری جانب وزیراعظم آفس کے میڈیا ونگ کی جانب سے جاری بیان کے مطابق وزیراعظم محمد شہباز شریف نے کہا کہ عبدالستار ایدھی جیسی انسان دوست اور خدمتِ خلق کے جذبے سے سرشار شخصیت بلا شبہ پوری قوم کے لیے باعثِ فخر اور ایک قومی اثاثہ ہے۔ انہوں نے ان کی گراں قدر قومی اور فلاحی خدمات پر انہیں خراجِ عقیدت پیش کیا۔
وزیراعظم نے کہا کہ عبدالستار ایدھی نے رفاہِ عامہ کے مخلصانہ جذبے کے تحت معاشرتی مسائل کے حل کے سماجی پہلوؤں کو اجاگر کیا اور ان کی بے مثال خدمات پاکستان کی سماجی تاریخ کا ایک غیر معمولی باب ہیں۔
شہباز شریف نے کہا کہ عبدالستار ایدھی جیسی شخصیات نوجوان نسل کے لیے قابلِ تقلید ہیں۔ انہوں نے اپنی عملی زندگی سے یہ ثابت کیا کہ ہر فرد اپنی استطاعت کے مطابق معاشرتی اصلاح اور انسانیت کی خدمت میں تعمیری کردار ادا کر سکتا ہے۔
یہ بھی پڑھیں:عبدالستار ایدھی کا مجمسہ دہشتگردی کا شکار‘ مجمسہ ساز کی حکومت سے بحالی کی اپیل
وزیراعظم نے کہا کہ عبدالستار ایدھی کی عوامی خدمات نے معاشرے میں احساسِ ذمہ داری، رواداری، باہمی ہم آہنگی اور انسانی ہمدردی جیسی مثبت اقدار کے فروغ میں نمایاں کردار ادا کیا، جبکہ ان کے قائم کردہ ادارے آج بھی لاکھوں مستحق افراد کی خدمت کر رہے ہیں۔
صدر آصف علی زرداری اور وزیراعظم شہباز شریف نے عبدالستار ایدھی کے درجات کی بلندی کے لیے دعا کرتے ہوئے اس عزم کا اظہار کیا کہ ان کی سماجی و فلاحی خدمات، انسان دوستی کا جذبہ اور خدمتِ خلق کا پیغام ہمیشہ قوم کے لیے مشعلِ راہ رہے گا۔
