اسلام آباد میں مقررہ نرخوں سے زائد قیمت پر ایل پی جی فروخت کرنے والوں کے خلاف ضلعی انتظامیہ نے کارروائی کرتے ہوئے 25 دکانیں سیل کر دیں، جبکہ ہمک کے علاقے میں ایک ایل پی جی پلانٹ بھی بند کر کے منیجر کو گرفتار کر لیا گیا۔ ڈپٹی کمشنر اسلام آباد نے مہنگی ایل پی جی فروخت کرنے والوں کے خلاف کارروائیاں جاری رکھنے کی ہدایت کی ہے۔
ضلعی انتظامیہ کے مطابق کارروائیاں شہر کے مختلف علاقوں میں کی گئیں، جہاں مقررہ نرخوں سے زائد قیمت وصول کرنے والی ایل پی جی شاپس کے خلاف کارروائی عمل میں لائی گئی۔
حکام کے مطابق ایچ 13 کے علاقے میں 3، جبکہ پی ڈبلیو ڈی اور جناح گارڈن میں 8 ایل پی جی دکانیں سیل کی گئیں۔
یہ بھی پڑھیے عوام کے لیے بڑی خوشخبری، اوگرا نے ایل پی جی کی قیمت میں بڑی کمی کردی
اسی طرح شاہ اللہ دتہ میں زائد قیمت وصول کرنے والی 4 دکانوں کو بند کر دیا گیا، جبکہ روات کے علاقے میں مجموعی طور پر 10 ایل پی جی شاپس سیل کی گئیں۔
ضلعی انتظامیہ نے جنگی سیداں میں بھی کارروائی کرتے ہوئے 3 دکانیں بند کر دیں۔
حکام کے مطابق ہمک کی حدود میں اوورچارجنگ پر ایک ایل پی جی پلانٹ سیل کیا گیا، جبکہ پلانٹ کے منیجر کو گرفتار کر لیا گیا۔
ڈپٹی کمشنر اسلام آباد نے متعلقہ افسران کو ہدایت کی ہے کہ عوام سے مقررہ قیمت سے زائد وصول کرنے والوں کے خلاف کارروائیوں کا سلسلہ جاری رکھا جائے اور صارفین کو ریلیف فراہم کرنے کے لیے مؤثر اقدامات کیے جائیں۔
