اگر آپ کا انسٹاگرام اکاؤنٹ عوامی ہے تو اب کوئی بھی شخص آپ کی تصاویر کو مصنوعی ذہانت کے ذریعے نئی تصاویر بنانے کے لیے استعمال کرسکتا ہے۔ میٹا کے نئے مصنوعی ذہانت کے تصویری ماڈل ’میوز امیج‘ کے ذریعے صارفین عوامی انسٹاگرام پروفائل کو ٹیگ کر کے کسی بھی شخص کے چہرے کو نئی مصنوعی تصاویر میں شامل کرسکتے ہیں۔
رپورٹ کے مطابق کوئی بھی شخص میٹا کے مصنوعی ذہانت والے نظام میں عوامی انسٹاگرام اکاؤنٹ کو ٹیگ کر کے اس پروفائل پر موجود تصاویر کو حوالہ بنا سکتا ہے، جس کے بعد نظام ان تصاویر کی مدد سے نئی تصاویر تیار کردیتا ہے۔
یہ بھی پڑھیں: ماضی کے لمحات تازہ کریں: اے آئی کے ذریعے اپنی کم عمری والی تصاویر بنائیں
اس عمل کے دوران نہ متعلقہ شخص سے اجازت لی جاتی ہے اور نہ ہی اسے کوئی اطلاع دی جاتی ہے۔
میٹا کی وضاحت کے مطابق مصنوعی ذہانت کے ذریعے تیار کیے گئے مواد کے بارے میں متعلقہ صارف کو اطلاع نہیں دی جائے گی۔ اس کا مطلب ہے کہ عوامی اکاؤنٹ رکھنے والے افراد کو علم بھی نہیں ہو سکے گا کہ ان کی تصاویر کو کسی مصنوعی ذہانت کے مواد میں استعمال کیا گیا ہے۔
انسٹاگرام نے ترتیبات میں شیئرنگ اور دوبارہ استعمال سے متعلق دو نئے اختیارات شامل کیے ہیں، جن کے ذریعے صارف اپنی پوسٹس اور مختصر ویڈیوز کو مصنوعی ذہانت کے ذریعے دوبارہ استعمال ہونے سے روک سکتے ہیں۔
تاہم یہ حفاظتی اختیارات خودکار طور پر فعال نہیں بلکہ صارف کو خود انہیں تبدیل کرنا ہوگا۔ یہ پابندی صرف مستقبل میں ہونے والے استعمال کو روکتی ہے، جبکہ پہلے سے تیار کی گئی مصنوعی تصاویر پر اس کا اثر نہیں پڑے گا۔
یہ بھی پڑھیں: میٹا کے اے آئی چشموں پر خفیہ ریکارڈنگ کے الزامات، پرائیویسی کا بحران؟
رپورٹس کے مطابق بعض صارفین کے اکاؤنٹس میں ابھی تک یہ اختیارات نظر نہیں آ رہے، جس کا مطلب ہے کہ کچھ افراد کو فی الحال یہ فیصلہ کرنے کا موقع نہیں ملا کہ وہ اپنی تصاویر کو مصنوعی ذہانت کے استعمال سے روکنا چاہتے ہیں یا نہیں۔
میٹا اس سے قبل بھی صارفین کے ڈیٹا کے استعمال پر تنقید کا سامنا کر چکا ہے۔ 2019 میں امریکی ادارے نے کیمبرج اینالیٹیکا معاملے پر میٹا پر ریکارڈ جرمانہ عائد کیا تھا، جبکہ 2021 میں کمپنی نے چہرہ شناخت کرنے والا نظام بھی بند کر دیا تھا۔
نیا مصنوعی ذہانت والا فیچر بھی صارفین کی رازداری اور اجازت سے متعلق بحث کو دوبارہ سامنے لے آیا ہے۔
