وزیراعظم شہباز شریف آج ایک روزہ دورے پر کوئٹہ پہنچیں گے، جہاں وہ نیشنل ایکشن پلان کی ایپکس کمیٹی کے اہم اجلاس کی صدارت کریں گے۔ اجلاس میں بلوچستان کی امن و امان کی مجموعی صورتحال کا تفصیلی جائزہ لیا جائے گا اور امن و استحکام کے لیے اہم فیصلوں کی منظوری متوقع ہے۔
حکومتی ذرائع کے مطابق وزیراعظم شہباز شریف آج ایک روزہ دورے پر کوئٹہ پہنچیں گے، جہاں ان کے ہمراہ وفاقی وزراء بھی موجود ہوں گے۔ ذرائع کا کہنا ہے کہ وزیراعلیٰ سیکرٹریٹ کوئٹہ میں نیشنل ایکشن پلان کی ایپکس کمیٹی کا اہم اجلاس منعقد ہوگا، جس کی صدارت وزیراعظم شہباز شریف کریں گے۔
یہ بھی پڑھیں:دہشتگردوں کو ہر قیمت پر انجام تک پہنچایا جائے گا، وزیراعلیٰ بلوچستان سرفراز بگٹی
اجلاس میں وزیراعلیٰ بلوچستان، وفاقی وزراء، اعلیٰ عسکری اور سول قیادت شرکت کرے گی، جبکہ فیلڈ مارشل سید عاصم منیر کی بھی اجلاس میں شرکت متوقع ہے۔
ذرائع کے مطابق ایپکس کمیٹی کے اجلاس میں بلوچستان کی امن و امان کی مجموعی صورتحال، دہشتگردی کے خلاف اقدامات اور صوبے میں سیکیورٹی کی موجودہ صورت حال کا تفصیلی جائزہ لیا جائے گا۔
اجلاس کے دوران امن و استحکام کو مزید مضبوط بنانے، قانون نافذ کرنے والے اداروں کی استعداد کار میں اضافے اور سیکیورٹی سے متعلق اہم فیصلوں کی منظوری بھی متوقع ہے۔
حکومتی ذرائع کے مطابق بلوچستان میں امن و استحکام کو یقینی بنانے اور دہشت گردی کے خاتمے کے لیے وفاقی اور صوبائی قیادت کے درمیان اہم مشاورت بھی اجلاس کا حصہ ہوگی۔
