اپنی انسٹاگرام تصاویر کو میٹا کے اے آئی سے بچانا چاہتے ہیں؟ صرف ایک سیٹنگ تبدیل کرکے خود کو محفوظ بنائیں

سوشل میڈیا کمپنی میٹا نے اپنی نئی اے آئی امیج جنریشن سروس ’میوز امیج‘ (Muse Image) متعارف کرا دی ہے، جس کے بعد صارفین کی پرائیویسی اور ذاتی تصاویر کے استعمال سے متعلق نئے خدشات جنم لینے لگے ہیں۔

نئے فیچر کے تحت صارفین میٹا کی ایپس کے اندر ہی مصنوعی ذہانت کی مدد سے نئی تصاویر تیار کر سکیں گے، موجودہ تصاویر میں تبدیلیاں کر سکیں گے اور اپنی مرضی کے مطابق اشتہارات بھی تخلیق کر سکیں گے۔

یہ بھی پڑھیں: میٹا نے نیا اے آئی ٹول ’میوز امیج‘ متعارف کرا دیا، انسٹاگرام پوسٹس سے نئی تصاویر بنائی جاسکیں گی

تاہم، سب سے زیادہ توجہ اس بات نے حاصل کی ہے کہ میوز امیج عوامی (پبلک) انسٹاگرام اکاؤنٹس کی تصاویر کو بھی اے آئی تصاویر بنانے کے لیے استعمال کر سکتا ہے۔ اگر کسی صارف کا انسٹاگرام اکاؤنٹ پبلک ہے تو دیگر افراد اس کے اکاؤنٹ کو ٹیگ کرکے اس کی تصاویر کو اے آئی سے تیار کردہ مواد میں شامل کر سکتے ہیں۔

صرف پرائیویٹ اکاؤنٹس اور 18 سال سے کم عمر صارفین کے اکاؤنٹس کو اس فیچر سے خودکار طور پر مستثنیٰ قرار دیا گیا ہے۔

ماہرین کا کہنا ہے کہ اس فیچر سے رضامندی، پرائیویسی اور تصاویر کے ممکنہ غلط استعمال سے متعلق سنگین سوالات پیدا ہو گئے ہیں کیونکہ بیشتر صارفین کو یہ معلوم بھی نہیں ہوگا کہ ان کی عوامی تصاویر کو دوسرے افراد اے آئی تصاویر میں استعمال کر سکتے ہیں۔ مزید یہ کہ اگر کسی کی تصاویر استعمال کی جائیں تو متعلقہ صارف کو اس بارے میں کوئی اطلاع بھی نہیں دی جاتی۔

میٹا کے ’میوز امیج‘ فیچر سے کیسے باہر نکلیں؟

اگر آپ نہیں چاہتے کہ آپ کی تصاویر اے آئی فیچر میں استعمال ہوں تو درج ذیل اقدامات کریں

اپنے انسٹاگرام پروفائل پر جائیں اور اوپر دائیں جانب موجود تین افقی لائنوں پر کلک کریں۔

نیچے اسکرول کرکے “Sharing and Reuse” کے آپشن پر جائیں۔

وہاں “Allow people to use your content on Instagram with AI features on Meta” کا آپشن تلاش کریں۔

Posts اور Reels دونوں کے لیے اس سیٹنگ کو بند (Off) کر دیں۔

یہ بھی پڑھیں: بغیر اطلاع اے آئی تصاویر کی تیاری، میٹا کے نئے فیچر پر صارفین پریشان

یہ فیچر ایسے وقت میں متعارف کرایا گیا ہے جب ٹیکنالوجی کمپنیاں تیزی سے مصنوعی ذہانت کو سوشل میڈیا پلیٹ فارمز میں شامل کر رہی ہیں، جبکہ ماہرین صارفین کے ڈیٹا اور تصاویر کے استعمال سے متعلق زیادہ شفافیت اور مضبوط پرائیویسی تحفظات کا مطالبہ کر رہے ہیں۔

واضح رہے کہ میٹا ماضی میں بھی صارفین کی پرائیویسی سے متعلق تنازعات کا سامنا کر چکی ہے۔ 2019 میں امریکی فیڈرل ٹریڈ کمیشن (FTC) نے فیس بک پر صارفین کی ذاتی معلومات کے غلط استعمال کے معاملے پر 5 ارب ڈالر کا ریکارڈ جرمانہ عائد کیا تھا، جبکہ کیمبرج اینالیٹیکا اسکینڈل میں کروڑوں صارفین کا ڈیٹا ان کی اجازت کے بغیر حاصل کیے جانے کا انکشاف بھی سامنے آیا تھا۔