پاکستان پیپلز پارٹی (پی پی پی) کی رہنما و سینیٹر پلوشہ خان نے کہا ہے کہ بھارت کی جانب سے پاکستان کا پانی بند کرنے کی کوشش خطے کو خوفناک جنگ کی طرف لے جاسکتی ہے۔
وی نیوز سے گفتگو کے دوران بھارت کی جانب سے پاکستان کا پانی روکنے سے متعلق سوال پر سینیٹر پلوشہ خان نے کہا ہے کہ بھارتی وزیراعظم نریندر مودی کی اس حرکت کا جواب انتہائی سخت ہوگا اور یہ معاملہ خونریز جنگ کی طرف بھی جاسکتا ہے۔
یہ بھی پڑھیں: ’بھارت نے پانی روکا تو پاکستان بھارت کی لائف لائن بند کر دے گا‘
انہوں نے کہا کہ مودی یہ سمجھ رہے ہیں کہ وہ اس اقدام کو اپنی سیاست کے لیے استعمال کریں گے، لیکن انہیں اندازہ نہیں کہ وہ نہ صرف بھارت کے ایک ارب عوام بلکہ پورے خطے کو ایک خطرناک صورتحال کی طرف دھکیل رہے ہیں۔
سینیٹر پلوشہ خان کا کہنا تھا کہ پاکستان کے 25 کروڑ عوام پانی کی ایک ایک بوند کے لیے ترسنے والے نہیں، اس طرح ختم ہونے سے بہتر ہے کہ مقابلہ کیا جائے۔
یہ بھی پڑھیں: سندھ طاس معاہدے کی بھارتی خلاف ورزی، پاکستانی دریاؤں میں پانی کی روانی متاثر
بلوچستان میں بھارتی حمایت یافتہ پراکسیز کی دہشت گرد کارروائیوں سے متعلق سوال پر انہوں نے کہا کہ ان عناصر سے نمٹنے کے لیے سخت اقدامات کی ضرورت ہے۔
ان کا کہنا تھا کہ بات چیت، سفارتی کوششیں اور دیگر طریقے آزما لیے گئے، لیکن اگر یہ عناصر باز نہیں آتے تو پھر سخت جواب ہی واحد راستہ ہے۔
