سپریم کورٹ میں نیب قوانین میں کی گئی حالیہ ترامیم کے بعد زیر التوا اپیلوں کی سماعت سے متعلق اہم کیس کل سماعت کے لیے مقرر کر دیا گیا ہے۔
کیس کی سماعت جسٹس محمد علی مظہر کی سربراہی میں سپریم کورٹ کا 3 رکنی بینچ کرے گا، جس میں جسٹس مسرت ہلالی اور جسٹس شاہد بلال بھی شامل ہیں۔
یہ بھی پڑھیں: وفاقی آئینی عدالت میں نیب ریکوری کیس کی سماعت، ماضی سے نیب ترامیم کے اطلاق پر اہم سوالات
وفاقی حکومت نے عدالت میں جمع کرائے گئے اپنے جواب میں استدعا کی ہے کہ نیب ترامیم کے بعد زیر التوا اپیلیں آئینی عدالت کو منتقل کی جائیں۔
وفاقی حکومت کے مطابق زیر التوا اپیلوں کے ساتھ ساتھ ضمانت سے متعلق مقدمات بھی آئینی عدالت ہی منتقل کیے جائیں۔
واضح رہے کہ پارلیمنٹ نے مارچ میں نیب قانون میں ترمیم کرتے ہوئے ہائی کورٹ کے فیصلوں کے خلاف نیب اپیلیں سننے کا اختیار آئینی عدالت کو دے دیا تھا۔
مزید پڑھیں: نیب ترامیم کی بحالی، احتساب بیورو نے عمران خان کے خلاف نیا توشہ خانہ کیس واپس لے لیا
اب 3 رکنی بینچ یہ فیصلہ کرے گا کہ نیب قانون میں کی گئی اس ترمیم کا اطلاق صرف نئے مقدمات پر ہوگا یا زیر التوا اپیلوں اور دیگر مقدمات پر بھی اس کا نفاذ ہوگا۔
یہ فیصلہ نیب سے متعلق متعدد زیر التوا مقدمات کی آئندہ سماعت کے فورم کے تعین کے لیے اہم قرار دیا جا رہا ہے۔
