آزاد جموں و کشمیر الیکشن کمیشن نے عام انتخابات 2026 کے سلسلے میں انتخابی ڈیوٹی پر مامور سرکاری ملازمین کے لیے خصوصی پولنگ کا باضابطہ نوٹیفکیشن جاری کر دیا ہے۔
نوٹیفکیشن کے مطابق انتخابی عملے میں شامل سرکاری ملازمین 20 جولائی 2026 کو خصوصی پولنگ کے ذریعے اپنا حقِ رائے دہی استعمال کریں گے۔
یہ بھی پڑھیے آزاد کشمیر انتخابات: کون سے سابق وزرائے اعظم اس معرکے کا حصہ ہیں؟
یہ انتظام اس مقصد کے تحت کیا گیا ہے کہ 27 جولائی کو عام انتخابات کے دوران پولنگ ڈیوٹی سرانجام دینے والے ملازمین اپنے ووٹ کے آئینی حق سے محروم نہ رہیں۔
الیکشن کمیشن نے ہدایت کی ہے کہ انتخابی عملے سے متعلق تمام انتظامات بروقت مکمل کیے جائیں تاکہ خصوصی پولنگ کا عمل شفاف، منظم اور بلا رکاوٹ انجام دیا جا سکے۔ اس سلسلے میں متعلقہ ریٹرننگ افسران اور ضلعی انتظامیہ کو بھی ضروری اقدامات کی ہدایات جاری کر دی گئی ہیں۔
یہ بھی پڑھیےآزاد کشمیر: پی ٹی آئی نے انتخابات کا بائیکاٹ کیوں کیا، 27 جولائی کو اس کا فائدہ کس پارٹی کو ہوگا؟
واضح رہے کہ آزاد جموں و کشمیر قانون ساز اسمبلی کے عام انتخابات 27 جولائی 2026 کو ہوں گے، جن کے لیے الیکشن کمیشن کی جانب سے انتخابی شیڈول کے مطابق مختلف مراحل مکمل کیے جا رہے ہیں، جبکہ پولنگ کے پرامن انعقاد کے لیے انتظامی اور سیکیورٹی تیاریاں بھی جاری ہیں۔
