ایپل کے آئندہ فلیگ شپ اسمارٹ فون آئی فون 18 پرو سے متعلق اہم لیکس سامنے آگئی ہیں جن کے مطابق کمپنی نئے ماڈل میں کیمرہ، ڈسپلے، بیٹری، ڈیزائن اور پروسیسر سمیت متعدد نمایاں تبدیلیاں متعارف کرا سکتی ہے۔
غیر ملکی میڈیا رپورٹس کے مطابق ایپل رواں برس اپنی روایتی لانچ حکمت عملی میں بھی تبدیلی پر غور کر رہا ہے۔ اطلاعات ہیں کہ کمپنی ستمبر 2026 میں آئی فون 18 پرو، آئی فون 18 پرو میکس اور اپنا پہلا فولڈیبل آئی فون متعارف کرائے گی، جبکہ نسبتاً کم قیمت والے ماڈلز آئی فون 18، آئی فون ایئر 2 اور آئی فون 18e کو 2027 کے موسم بہار میں لانچ کیا جا سکتا ہے۔
یہ بھی پڑھیں: کیا آئی فون 18 پرو ایپل کا مہنگا ترین فون ہوگا؟ لانچ اور قیمت سے متعلق بڑی خبر
رپورٹس کے مطابق آئی فون 18 پرو کا مجموعی ڈیزائن گزشتہ ماڈل سے ملتا جلتا ہوگا، تاہم اس بار صارفین کو چیری ریڈ اور ہلکے نیلے سمیت نئے رنگوں کے انتخاب کا امکان ہے۔ دوسری جانب آئی فون 18 پرو میکس میں بڑی بیٹری کی وجہ سے اس کی موٹائی اور وزن میں معمولی اضافہ بھی متوقع ہے۔
ذرائع کا کہنا ہے کہ ایپل ڈائنامک آئی لینڈ کو پہلے کے مقابلے میں تقریباً 35 فیصد چھوٹا کر سکتا ہے جس کے لیے فیس آئی ڈی کے کچھ سینسر اسکرین کے نیچے منتقل کیے جانے کا امکان ہے۔ اس سے صارفین کو زیادہ بڑا ڈسپلے ایریا دستیاب ہوگا۔
یہ بھی پڑھیں: ایپل کے فولڈایبل فون کے حصول کے لیے صارفین کو کتنا انتظار کرنا پڑسکتا ہے؟
کیمرہ سسٹم میں بھی اہم تبدیلی متوقع ہے۔ اطلاعات کے مطابق آئی فون 18 پرو میں پہلی مرتبہ ویری ایبل اپرچر ٹیکنالوجی متعارف کرائی جا سکتی ہے جو روشنی کے مطابق خودکار انداز میں اپرچر کو ایڈجسٹ کرے گی جس سے کم اور زیادہ روشنی دونوں صورتوں میں بہتر تصاویر لینا ممکن ہوگا۔
رپورٹس میں یہ بھی بتایا گیا ہے کہ نئے فون میں A20 چپ استعمال کیے جانے کا امکان ہے جو TSMC کی جدید 2 نینو میٹر ٹیکنالوجی پر تیار کی جائے گی۔ اس نئی چپ سے کارکردگی اور توانائی کی بچت میں نمایاں بہتری آنے کی توقع ہے، اگرچہ اس کی تیاری پر لاگت میں اضافے کا بھی امکان ظاہر کیا جا رہا ہے۔
یہ بھی پڑھیں: ایپل کے آئی فون 18 اور آئی فون 18ای کے ماڈلز میں 9جی بی ریم شامل کیے جانے کا امکان
لیکس کے مطابق ایپل اس بار اپنی چپ حکمت عملی میں بھی تبدیلی لا سکتا ہے اور ممکن ہے کہ پوری آئی فون 18 سیریز میں ایک ہی طاقتور A20 پروسیسر فراہم کیا جائے جس سے بنیادی اور پرو ماڈلز کی کارکردگی میں فرق کم ہو جائے گا۔
بیٹری کے حوالے سے بھی دعویٰ کیا گیا ہے کہ آئی فون 18 پرو میکس میں تقریباً 5,200mAh جبکہ آئی فون 18 پرو میں 4,288mAh گنجائش کی بیٹری دی جا سکتی ہے جو نئے پروسیسر کے ساتھ مل کر طویل بیٹری لائف فراہم کرے گی۔
یہ بھی پڑھیں: ایپل کا اوپن اے آئی پر بڑا مقدمہ، چیٹ جی پی ٹی اور آئی فون استعمال کرنے والوں پر کیا اثر پڑے گا؟
تاہم یہ تمام معلومات مختلف لیکس اور غیر سرکاری رپورٹس پر مبنی ہیں جبکہ ایپل نے اب تک آئی فون 18 سیریز کی کسی بھی خصوصیت یا لانچ شیڈول کی باضابطہ تصدیق نہیں کی ہے۔
