وزیر دفاع خواجہ آصف نے کہا ہے کہ کشمیری مہاجرین کی قربانیاں بے حد اہم ہیں، پاکستان کو یہ آزادی ان لوگوں کی قربانیوں کے نتیجے میں ملی جنہوں نے اپنا خون دیا۔
مزید پڑھیں:کشمیر انتخابات: انتخابی مہم آخری مرحلے میں داخل، الیکشن کمیشن تیار
ایل اے 36 جموں 3 میں کارکنوں سے خطاب کرتے ہوئے خواجہ آصف نے کہا کہ انہوں نے آزاد کشمیر کے کئی انتخابات دیکھے ہیں، تاہم موجودہ انتخابات جس پس منظر میں ہو رہے ہیں، اس نوعیت کے حالات پہلے نہیں دیکھے گئے۔ ان کے مطابق یہ الیکشن کشمیر کاز سے وابستگی اور کشمیری عوام کے تحفظ کے عزم کا اظہار ہیں۔
وزیر دفاع کا کہنا تھا کہ کشمیری مہاجرین کی قدر و قیمت بہت زیادہ ہے، کیونکہ انہوں نے بڑی قربانیاں دی ہیں۔ انہوں نے کہا کہ کشمیر میں پاکستان کے حق میں آواز اٹھانے والے کئی نوجوانوں کو حراست میں لیا گیا اور وہ اپنے گھروں کو واپس نہیں پہنچ سکے۔
خواجہ آصف نے سوال اٹھایا کہ کیا بیرونِ ملک بیٹھا کوئی کشمیری ان لوگوں کی قربانیوں کا مقابلہ کرسکتا ہے جنہوں نے کشمیر کاز کے لیے مشکلات برداشت کیں۔ انہوں نے کہا کہ قائداعظم محمد علی جناح نے کشمیر کو پاکستان کی شہہ رگ قرار دیا تھا اور آج پاکستان و کشمیر کے تاریخی رشتے کو چیلنج کیا جا رہا ہے۔
مزید پڑھیں:یومِ الحاقِ پاکستان: وزیراعظم شہبازشریف کا کشمیریوں کے حقِ خودارادیت کی بھرپور حمایت کا اعادہ
انہوں نے مزید کہا کہ کچھ لوگ قربانیوں کے ذریعے رشتے مضبوط کرتے ہیں جبکہ کچھ صرف باتوں تک محدود رہتے ہیں۔ ان کا کہنا تھا کہ گزشتہ 4 برس میں ہزاروں قربانیاں دینے والی فوج پر تنقید کی جاتی ہے، جبکہ شہدا اور غازیوں نے وطن کی عزت اور سلامتی کے لیے کردار ادا کیا۔
وزیر دفاع نے فیلڈ مارشل کے عہدے کو وطن سے محبت اور خدمت کا رشتہ قرار دیتے ہوئے کہا کہ شہدا اور غازیوں کو سلام پیش کرتے ہیں جنہوں نے ملک کا وقار برقرار رکھا۔ انہوں نے کہا کہ عالمی تنازعات میں بھی پاکستان کا نام بار بار عالمی سطح پر زیرِ بحث آتا ہے۔
