مشرقِ وسطیٰ میں امریکا اور ایران کے درمیان حملوں میں شدت آنے کے بعد پاکستان اسٹاک ایکسچینج میں پیر کے روز شدید فروخت کے رجحان کے باعث انڈیکس کاروبار کے دوران ایک ہزار سے زائد پوائنٹس کی کمی کا شکار ہوگیا۔
دوپہر 12 بج کر 34 منٹ پر بینچ مارک کے ایس ای 100 انڈیکس 1,027.82 پوائنٹس یعنی 0.58 فیصد کی کمی کے بعد 174,774.96 پوائنٹس پر ٹریڈ کر رہا تھا۔
یہ بھی پڑھیں: اسٹاک مارکیٹ بلند ترین سطح پر پہنچ کر مندی سے دوچار، کیا معیشت خطرے میں ہے؟
مارکیٹ میں فروخت کا دباؤ آٹوموبائل، سیمنٹ، کمرشل بینکوں، فرٹیلائزر، آئل اینڈ گیس ایکسپلوریشن، آئل مارکیٹنگ کمپنیوں اور بجلی پیدا کرنے والے شعبوں میں نمایاں رہا۔
او جی ڈی سی ایل، ماری انرجیز، پاکستان پیٹرولیم لمیٹڈ، پاکستان آئل فیلڈز، حبکو، مسلم کمرشل بینک، میزان بینک اور نیشنل بینک جیسے مارکیٹ پر اثرانداز ہونے والے بڑے شیئرز منفی زون میں ٹریڈ کرتے رہے۔
Market is down at midday 👇
⏳ KSE 100 is negative by -1244.66 points (-0.71%) at midday trading. Index is at 174,558.13 and volume so far is 144.9 million shares (12:00 PM) pic.twitter.com/Skb5XSi3Vx— Investify Pakistan (@investifypk) July 20, 2026
گزشتہ ہفتے بھی پاکستان اسٹاک ایکسچینج شدید دباؤ کا شکار رہی تھی، علاقائی جغرافیائی سیاسی کشیدگی میں اضافے اور عالمی منڈی میں خام تیل کی قیمتوں میں تیزی سے سرمایہ کاروں کا اعتماد متاثر ہوا، جس کے باعث مارکیٹ مسلسل دوسرے ہفتے بھی مندی کی لپیٹ میں رہی۔
ہفتہ وار مارکیٹ جائزے کے مطابق کے ایس ای 100 انڈیکس گزشتہ ہفتے 3.5 فیصد یعنی 6,438.97 پوائنٹس کمی کے بعد 175,802.80 پوائنٹس پر بند ہوا۔
مزید پڑھیں: اسٹاک ایکسچینج شدید مندی کا شکار، انڈیکس تقریباً 5 ہزار پوائنٹس گر گیا
دوسری جانب عالمی مالیاتی منڈیوں میں بھی دباؤ برقرار ہے، خلیجی خطے میں کشیدگی بڑھنے سے خام تیل کی قیمتوں میں نمایاں اضافہ ہوا ہے، جس کے باعث مہنگائی کے خدشات دوبارہ شدت اختیار کر گئے ہیں۔
برینٹ خام تیل کی قیمت ایک ماہ سے زائد عرصے میں پہلی بار 90 ڈالر فی بیرل سے تجاوز کر گئی۔
امریکا کی جانب سے ایران پر مسلسل نویں روز حملوں اور ایران کی جانب سے خطے میں جوابی کارروائیوں نے سرمایہ کاروں کو تشویش میں مبتلا کر دیا ہے۔
آبنائے ہرمز سے جہازوں کی آمدورفت بھی متاثر ہوئی ہے اور ایک بحری جہاز میں آگ لگنے کی اطلاعات موصول ہوئی ہیں۔
برینٹ خام تیل 2.6 فیصد اضافے کے ساتھ 90.40 ڈالر فی بیرل جبکہ امریکی خام تیل 2.3 فیصد بڑھ کر 84.39 ڈالر فی بیرل تک پہنچ گیا۔
مزید پڑھیں: عالمی معیشت میں بہتری: اسٹاک مارکیٹ اور سونے چاندی میں سرمایہ کاری کب کی جائے؟
عالمی اسٹاک مارکیٹوں میں بھی مندی کا رجحان دیکھا گیا۔ ایشیا پیسیفک حصص کا ایم ایس سی آئی انڈیکس 0.3 فیصد نیچے آگیا، جبکہ چین کے بلیو چپ شیئرز میں 1.4 فیصد اضافہ ریکارڈ کیا گیا۔
جنوبی کوریا کی ٹیکنالوجی پر مشتمل مارکیٹ مزید 4.2 فیصد گر گئی، جبکہ جاپان کی نکی مارکیٹ سرکاری تعطیل کے باعث بند رہی، جو گزشتہ ہفتے 6.4 فیصد کمی کا شکار ہوئی تھی۔
