ہالی ووڈ کے سپر اسٹار ٹام کروز اور اداکارہ کیٹی ہومز کی بیٹی سوری نے اپنی زندگی کا ایک اہم فیصلہ کرتے ہوئے قانونی طور پر اپنے والد کا خاندانی نام ’کروز‘ ترک کر دیا ہے۔ 20 سالہ سوری نے اب اپنی والدہ کے درمیانی نام کو اپناتے ہوئے خود کو ’سوری نویل‘ کے نام سے رجسٹر کرا لیا ہے جسے ان کی نئی شناخت اور زندگی کے ایک نئے باب کے آغاز کے طور پر دیکھا جا رہا ہے۔
بین الاقوامی میڈیا رپورٹس کے مطابق، 20 سالہ سوری کا نیا نام سوری نویل امریکی ریاست پنسلوانیا کے ایلیگینی کاؤنٹی کے ووٹر رجسٹریشن ریکارڈ میں درج ہے۔ بتایا گیا ہے کہ انہوں نے اکتوبر 2024 میں Carnegie Mellon University میں اپنے پہلے تعلیمی سال کے دوران ووٹر کے طور پر رجسٹریشن کرائی تھی۔
یہ بھی پڑھیں: 64 سال کی عمر میں بھی ٹام کروز اتنے فِٹ کیسے ہیں؟ اداکار نے اپنی فٹنس کا راز بتا دیا
رپورٹس کے مطابق سوری نے پہلی بار 2024 میں اپنی ہائی اسکول گریجویشن تقریب کے دوران بھی سوری نویل کا نام استعمال کیا تھا جس کے بعد اب قانونی دستاویزات میں بھی یہی نام درج ہو چکا ہے۔
سوری اپریل 2006 میں پیدا ہوئیں۔ ان کے والدین ٹام کروز اور کیٹی ہومز نے 2006 میں شادی کی تھی تاہم 2012 میں دونوں کی راہیں جدا ہو گئیں۔ طلاق کے بعد سوری زیادہ تر اپنی والدہ کے ساتھ رہتی آئی ہیں اور میڈیا کی توجہ سے دور زندگی گزار رہی ہیں۔
یہ بھی پڑھیں: ٹام کروز اور آنا دی آرمس کا تعلق محض 9 ماہ بعد ہی ختم، کیا وجہ بنی؟
گزشتہ برس جب سوری اعلیٰ تعلیم کے لیے گھر سے روانہ ہوئیں تو کیٹی ہومز نے ایک انٹرویو میں کہا تھا کہ انہیں اپنی بیٹی پر بے حد فخر ہے اور وہ اس کی زندگی کے نئے سفر پر خوش ہیں، اگرچہ وہ اس کی کمی ضرور محسوس کریں گی۔
دسمبر 2024 میں کیٹی ہومز نے اپنی بیٹی کے مالی معاملات سے متعلق سامنے آنے والی خبروں کی بھی تردید کی تھی۔ انہوں نے سوشل میڈیا پر ایک رپورٹ کو ’مکمل طور پر جھوٹ‘ قرار دیتے ہوئے میڈیا سے من گھڑت خبریں شائع نہ کرنے کا مطالبہ کیا تھا۔
