فیفا ورلڈ کپ کے نوجوان ہسپانوی اسٹار لامین یامال نے اسپینش کلب بارسلونا کے ساتھ 6 سالہ نئے معاہدے کے بعد سابق فٹبالر جیرارڈ پیکے اور معروف گلوکارہ شکیرا کا لگژری گھر خرید لیا ہے جو بارسلونا کے مضافاتی علاقے اسپلگیس دے یوبریگات (Esplugues de Llobregat) میں واقع ہے۔
مزید پڑھیں:اسپین کی ورلڈ کپ فتح کے بعد لامین یامال بیلن ڈی اور کی دوڑ میں مضبوط امیدوار بن گئے
رپورٹس کے مطابق 2012 میں تعمیر ہونے والی اس عالی شان رہائش گاہ کی ابتدائی قیمت 1 کروڑ 40 لاکھ یورو (قریباً 1 کروڑ 59 لاکھ امریکی ڈالر) رکھی گئی تھی، تاہم لامین یامال نے یہ محل نما گھر ایک کروڑ 10 لاکھ یورو قریباً 1 کروڑ 26 لاکھ امریکی ڈالر (لگ بھگ 3 ارب 60 کروڑ پاکستانی روپے) میں خرید لیا۔ یہ گھر 2022 میں پیکے اور شکیرا کی علیحدگی کے بعد سے خالی پڑا تھا۔
بحیرۂ روم کے خوبصورت مناظر والے اس گھر میں 6 بیڈروم، 5 باتھ روم، اندرونی اور بیرونی سوئمنگ پول، نجی ٹینس کورٹ، جدید فٹنس سینٹر، متعدد ٹیرسز اور دیگر پرتعیش سہولیات موجود ہیں۔
مزید پڑھیں:خیراتی مہم کی تصویر سے ورلڈ کپ فائنل تک، میسی اور یامال کی انوکھی داستان
واضح رہے کہ لامین یامال نے حال ہی میں بارسلونا کے ساتھ قریباً 3 کروڑ یورو سالانہ مالیت کے 6 سالہ معاہدے پر دستخط کیے ہیں، جس کے بعد انہوں نے یہ مشہور رہائش گاہ خریدی ہے۔
