وفاقی وزیر داخلہ محسن نقوی سے خیبر پختونخوا اور بلوچستان کے تاجروں اور صنعتکاروں کے وفد نے اہم ملاقات کی، جس میں دونوں صوبوں کی سیکیورٹی صورتحال، امن و امان کے درپیش چیلنجز اور تجارتی برادری کو درپیش مسائل پر تفصیلی تبادلہ خیال کیا گیا۔
ملاقات کے دوران خیبر پختونخوا اور بلوچستان کے تمام چیمبرز آف کامرس کے نمائندوں نے وزیر داخلہ کو اپنے اپنے صوبوں میں تاجر برادری کو درپیش مشکلات اور موجودہ سیکیورٹی صورتحال کے بارے میں تفصیلی آگاہ کیا۔
یہ بھی پڑھیے جب تک سب ساتھ نہیں بیٹھیں گے، ملک ایسے ہی چلتا رہے گا، وفاقی وزیر داخلہ محسن نقوی
وزیر داخلہ محسن نقوی نے وفد کو ملک بالخصوص خیبر پختونخوا اور بلوچستان میں امن و امان کی مجموعی صورتحال اور اس حوالے سے کیے جانے والے حکومتی اقدامات سے آ گاہ کیا۔ انہوں نے کاروباری برادری کو حکومت کے مکمل تعاون کی یقین دہانی کراتے ہوئے کہا کہ تاجروں اور صنعتکاروں کے مسائل کے حل اور ان کے تحفظ کے لیے تمام ممکنہ وسائل بروئے کار لائے جائیں گے۔
پشاور اور کوئٹہ کے دورے کا اعلان
ملاقات میں محسن نقوی نے اعلان کیا کہ وہ جلد پشاور اور کوئٹہ کا خود دورہ کریں گے۔ انہوں نے بتایا کہ ان دوروں کے دوران متعلقہ صوبائی حکومتوں کے اعلیٰ حکام اور نمائندوں کی موجودگی میں تاجروں سے تفصیلی نشستیں کی جائیں گی تاکہ درپیش مسائل کا مستقل اور عملی حل نکالا جا سکے۔
یہ بھی پڑھیے صدر زرداری سے محسن نقوی کی ملاقات، خیبرپختونخوا اور بلوچستان کی سیکیورٹی صورتحال پر تفصیلی تبادلہ خیال
وفاقی وزیر داخلہ کا موقف
’کاروباری برادری کو محفوظ اور سازگار ماحول کی فراہمی حکومت کی اولین ترجیح ہے۔ ملکی معیشت کے استحکام میں نجی شعبے کا کردار کلیدی اہمیت رکھتا ہے اور پاکستان کی ترقی تاجر برادری کی ترقی میں ہی پنہاں ہے۔ پوری حکومت تاجر برادری کے ساتھ کھڑی ہے اور ان کے تمام جائز مسائل ترجیحی بنیادوں پر حل کیے جائیں گے۔‘
