بالی ووڈ کے سپر اسٹار سلمان خان نے برسوں بعد اپنی جیل کی زندگی سے متعلق ایک نایاب انکشاف کرتے ہوئے کہا ہے کہ انہیں انتہائی مشکل حالات میں وقت گزارنا پڑا جہاں ایک چھوٹی سی جگہ میں 50 سے 70 افراد موجود ہوتے تھے۔
سلمان خان نے یہ انکشاف پرائم ویڈیو کے ریئلٹی شو کے نئے پرومو میں کیا جہاں وہ بطور مہمان اپنے بھائی سہیل خان کی حوصلہ افزائی کے لیے شریک ہوئے۔ گفتگو کے دوران انہوں نے 1998 کے بلیک بک اور چنکارا شکار کیسز کے سلسلے میں جیل میں گزارے گئے دنوں کا ذکر کرتے ہوئے وہاں کے ماحول اور مشکلات سے متعلق بات کی۔
یہ بھی پڑھیں: حکومت مخالف طلبہ تحریک کی حمایت میں سلمان خان، عالیہ بھٹ سمیت کئی بالی ووڈ فنکار میدان میں آگئے
سلمان خان نے کہا کہ کئی سال پہلے جب میں جیل گیا تو ہمارے سامنے سلاخیں تھیں۔ ایک بہت ہی چھوٹی جگہ میں 50 سے 70 افراد موجود ہوتے تھے۔ وہاں صرف ایک بھارتی طرز کا بیت الخلا تھا، ہر طرف چھپکلیاں تھیں اور صفائی کی صورتحال بھی انتہائی خراب تھی۔
بھارتی میڈیا کے مطابق سلمان خان جنگلی حیات سے متعلق مقدمات کے سلسلے میں مختلف اوقات میں چار مرتبہ جیل یا عدالتی تحویل میں رہے اور مجموعی طور پر تقریباً 18 دن جیل میں گزارے۔
یہ بھی پڑھیں: میں اکیلا نہیں ہوں، سلمان خان کی انسٹا پوسٹ نے ماں سمیت لاکھوں مداحوں کو بے چین کردیا
یہ پہلا موقع نہیں کہ سلمان خان نے جیل کے تجربات پر بات کی ہو۔ 2008 میں ایک ٹی وی انٹرویو کے دوران بھی انہوں نے کہا تھا کہ جیل میں انہیں سب سے زیادہ دشواری وہاں کے بیت الخلا کے استعمال میں پیش آئی تاہم انہوں نے پوری مدت کے دوران خود کو پُرسکون رکھا۔ ان کا کہنا تھا کہ اگر کوئی شخص خود کو بے قصور سمجھتے ہوئے بھی جیل جائے تو اسے اس صورتحال کا وقار اور حوصلے کے ساتھ سامنا کرنا چاہیے۔
