وزیراعلیٰ بلوچستان میر سرفراز بگٹی نے یومِ استحصالِ کشمیر کے موقع پر کشمیری عوام سے مکمل یکجہتی کا اظہار کرتے ہوئے کہا ہے کہ 5 اگست 2019 کو بھارت کے غیرقانونی اقدامات عالمی قوانین اور اقوامِ متحدہ کی سلامتی کونسل کی قراردادوں کی صریح خلاف ورزی ہیں۔
مزید پڑھیں:یومِ استحصالِ کشمیر: پاکستان کا کشمیری عوام کے حقِ خودارادیت کی حمایت کا اعادہ
اپنے پیغام میں وزیراعلیٰ بلوچستان نے کہا کہ یومِ استحصالِ کشمیر کشمیری عوام پر ڈھائے جانے والے مظالم اور انسانی حقوق کی مسلسل خلاف ورزیوں کی یاد دلاتا ہے۔ انہوں نے کہا کہ بلوچستان کے عوام اپنے کشمیری بھائیوں اور بہنوں کی حقِ خودارادیت کی جدوجہد میں ان کے شانہ بشانہ کھڑے ہیں۔
میر سرفراز بگٹی نے کہا کہ پاکستان کشمیری عوام کے حقِ خودارادیت کی ہر سطح پر سیاسی، سفارتی اور اخلاقی حمایت جاری رکھے گا۔ ان کا کہنا تھا کہ مسئلہ کشمیر کا اقوامِ متحدہ کی قراردادوں اور کشمیری عوام کی امنگوں کے مطابق منصفانہ حل ہی جنوبی ایشیا میں پائیدار امن کی ضمانت ہے۔
وزیراعلیٰ بلوچستان نے کشمیری عوام کی استقامت، قربانیوں اور آزادی کی جدوجہد کو خراجِ تحسین پیش کرتے ہوئے عالمی برادری پر زور دیا کہ وہ مقبوضہ جموں و کشمیر میں انسانی حقوق کی خلاف ورزیوں کا نوٹس لے اور کشمیری عوام کو ان کا بنیادی حقِ خودارادیت دلانے کے لیے مؤثر کردار ادا کرے۔
مزید پڑھیں:یومِ استحصالِ کشمیر: صدر اور وزیراعظم کا کشمیری عوام کی بھرپور حمایت کا اعلان
انہوں نے اس عزم کا بھی اعادہ کیا کہ بلوچستان کے عوام کشمیری عوام کے ساتھ اپنی غیرمتزلزل یکجہتی برقرار رکھیں گے اور ان کی جائز جدوجہد کی کامیابی تک ان کے ساتھ کھڑے رہیں گے۔
