خیبر پختونخوا کے ضلع لکی مروت کے علاقے بہرام خیل میں گھریلو جھگڑے کے دوران گھر کے اندر دستی بم پھٹنے سے 3 افراد جاں بحق جبکہ 3 بچے زخمی ہوگئے۔
پولیس کے مطابق واقعہ اس وقت پیش آیا جب گھر میں کسی بات پر جھگڑا جاری تھا۔ اسی دوران دستی بم زور دار دھماکے سے پھٹ گیا۔
یہ بھی پڑھیں: لکی مروت میں پولیس کا کامیاب آپریشن، 3 انتہائی مطلوب دہشتگرد ہلاک
جس کے نتیجے میں ایک مرد، اس کی بھابھی اور بھتیجا موقع پر ہی جاں بحق ہوگئے، جبکہ 3 بچے زخمی ہو گئے۔
اطلاع ملتے ہی پولیس اور ریسکیو اہلکار موقع پر پہنچ گئے اور جاں بحق افراد کی لاشوں اور زخمی بچوں کو فوری طور پر قریبی اسپتال منتقل کر دیا، جہاں زخمیوں کو طبی امداد فراہم کی جا رہی ہے۔
مزید پڑھیں: لکی مروت: سیکیورٹی فورسز کی کارروائی، بھارتی حمایت یافتہ 5 دہشتگرد ہلاک
پولیس حکام کا کہنا ہے کہ ابتدائی طور پر واقعہ گھر میں موجود دستی بم پھٹنے کے باعث پیش آیا، تاہم یہ دستی بم گھر میں کیسے پہنچا اور دھماکا کن حالات میں ہوا، اس حوالے سے مختلف پہلوؤں سے تحقیقات جاری ہیں۔
پولیس نے جائے وقوعہ سے شواہد اکٹھے کر لیے ہیں اور واقعے کی مکمل تفتیش کے بعد ہی دھماکے کی اصل وجوہات سامنے آسکیں گی۔
