فٹ بال کی دنیا کے نامور کھلاڑی کرسٹیانو رونالڈو اور ان کی طویل المدتی پارٹنر جورجینا روڈریگیز نے مبینہ شادی سے تمام تر اثاثے الگ الگ رکھنے سے متعلق معاہدے پر دستخط کر دیے ہیں۔
اطلاعات کے مطابق دونوں شخصیات نے منگل کے روز لزبن میں ایک انتہائی نجی سول تقریب کے دوران باضابطہ شادی کی، جس میں ان کے بچوں اور چار گواہوں نے شرکت کی۔
پرتگالی اخبار ‘جورنل ڈی نوٹیشیاس’ کے مطابق رونالڈو اور جورجینا نے لزبن میں ایک پبلک نوٹری کے دفتر میں 10 اگست یعنی شادی کی تاریخ سے ایک دن قبل اس ازدواجی معاہدے کو حتمی شکل دی۔ اس قانونی بندوبست کا بنیادی مقصد دونوں کے اثاثوں اور جائیدادوں پر ان کا انفرادی ملکیتی حق برقرار رکھنا ہے، جس کے تحت شادی سے قبل حاصل کی گئی تمام منقولہ و غیر منقولہ املاک مکمل طور پر ان کی ذاتی ملکیت ہی رہیں گی۔
یہ بھی پڑھیے کرسٹیانو رونالڈو کی خفیہ شادی، والدہ اور بہن بھائیوں کی عدم شرکت نے نئی بحث چھیڑ دی
یہ معاہدہ جوڑے کے کثیر اثاثوں اور املاک کی دیکھ بھال کے لیے ایک واضح قانونی فریم ورک فراہم کرتا ہے، بالخصوص کسی بھی متوقع جدائی یا دیگر ناگہانی صورتحال کے پیشِ نظر مالی خدشات کا ازالہ کرتا ہے۔
اخبار کی جانب سے شائع کی جانے والی نکاح نامے کی کاپی میں دونوں کے ذاتی کوائف درج ہیں، جن میں رونالڈو کا مکمل نام، عمر اور جائے پیدائش کے علاوہ ان کے والدین کے نام بھی شامل ہیں۔
دستاویزات کے مطابق 32 سالہ جورجینا کا مقامِ پیدائش بیونس آئرس (ارجنٹائن) جبکہ 41 سالہ رونالڈو کا تعلق مڈیرا (پرتگال) سے ظاہر کیا گیا ہے۔ اس کے علاوہ شادی کے بعد بھی دونوں اپنے اپنے خاندانی نام (سرنیم) برقرار رکھیں گے اور جورجینا رونالڈو کا خاندانی نام اپنانے کے بجائے اپنا نام ‘روڈریگیز’ ہی استعمال کرتی رہیں گی۔
یہ بھی پڑھیے رونالڈو اور جارجینا کی شادی میں کیا خاص تھا؟ دلہن کے سادہ عروسی لباس، ناخن اور انگوٹھیوں نے سب کو حیران کردیا
بتایا گیا ہے کہ اس نجی سول تقریب کی رسم رجسٹرار ماریا مانوئل فریرا نے ادا کی، جنہوں نے اس خاص موقع کے لیے پورٹو سے کاشکائش کا سفر کیا۔
واضح رہے کہ رونالڈو اور جورجینا گزشتہ کئی برسوں سے ایک ساتھ ہیں اور فٹ بالر کی عالمگیر شہرت اور اربوں ڈالرز کے مالیاتی مفادات کے باعث ان کا تعلق ہمیشہ ذرائع ابلاغ کی توجہ کا مرکز رہا ہے۔ شادی کے اس معاہدے سے ان کے گراں قدر اثاثوں کی ملکیت کے حوالے سے تمام معاملات زیادہ واضح اور شفاف ہو گئے ہیں۔
