وزیر سیاحت، صنعت، تجارت، لیبر و معدنی وسائل عبدالرحمان آرائیں نے کہا ہے کہ آزاد کشمیر میں سرمایہ کاری کے فروغ، صنعتی سرگرمیوں کی بحالی اور ریاستی آمدن میں اضافے کے لیے عملی اقدامات ناگزیر ہیں، سرمایہ کاروں کو سہولیات فراہم کرکے کاروبار کے لیے سازگار ماحول یقینی بنایا جائے۔
محکمہ صنعت، تجارت، لیبر و معدنی وسائل کی محکمانہ بریفنگ کے دوران وزیر حکومت نے کہاکہ ریاست کی بہتری اور عوام کی فلاح کے لیے تمام اداروں کو مل کر کام کرنا ہوگا۔
پرنسپل سیکرٹری ہمراہ وزیراعظم و سیکریٹری صنعت، تجارت، لیبر و معدنی وسائل سردار عدنان خورشید نے وزیر حکومت کو محکمہ کی کارکردگی اور مختلف امور پر بریفنگ دی، جبکہ دیگر افسران بھی اس موقع پر موجود تھے۔
عبدالرحمان آرائیں نے کہاکہ آزاد کشمیر میں موجود وسائل کو بروئے کار لاکر آمدن کے نئے ذرائع پیدا کیے جائیں۔ سرمایہ کاروں کو غیر ضروری مشکلات سے نجات دلانے اور کاروبار شروع کرنے کے مراحل آسان بنانے کی ضرورت ہے تاکہ مقامی اور بیرونی سرمایہ کار ریاست میں سرمایہ کاری کریں۔
انہوں نے بند پڑے صنعتی یونٹس اور پلانٹس کو فعال بنانے کی ہدایت کرتے ہوئے کہا کہ جو یونٹس موجودہ سرمایہ کار مقررہ مدت میں فعال نہیں کرسکتے، وہاں نئے سرمایہ کاروں کو مواقع فراہم کیے جائیں۔ غیر فعال صنعتی اثاثوں کو پیداواری سرگرمیوں میں تبدیل کرکے روزگار کے نئے مواقع پیدا کیے جا سکتے ہیں۔
وزیر حکومت نے کہاکہ صنعتی اراضی اور سرکاری وسائل کو مؤثر انداز میں استعمال کیا جائے تاکہ ریاستی آمدن میں اضافہ ہو۔ نوجوانوں کو روزگار کی فراہمی اور صنعتی ترقی کے لیے جامع حکمت عملی مرتب کی جائے۔
انہوں نے محکمہ صنعت، تجارت، لیبر و معدنی وسائل کی کارکردگی مزید بہتر بنانے اور ریاست میں سرمایہ کاری کے فروغ کے لیے مؤثر اقدامات اٹھانے پر زور دیا۔
