پاکستانی شوبز کی مقبول اداکارہ ہانیہ عامر نے ایک اور شعبے میں قدم رکھنے کی تیاری کرلی، اداکاری اور گلوکاری کے بعد اب انہیں باکسنگ رنگ میں بھی دیکھا جارہا ہے۔
ہانیہ عامر کی باکسنگ ٹریننگ کی ایک ویڈیو سوشل میڈیا پر گردش کر رہی ہے جس میں انہیں باکسنگ رنگ میں باقاعدہ تربیت حاصل کرتے دیکھا جاسکتا ہے۔
View this post on Instagram
اداکارہ کو ڈبلیو بی او یوتھ ورلڈ باکسنگ چیمپئن عثمان وزیر باکسنگ کی تربیت دے رہے ہیں۔ ویڈیو میں ہانیہ عامر کو مختلف باکسنگ تکنیکس کی مشق کرتے ہوئے دیکھا جاسکتا ہے۔
گفتگو کرتے ہوئے عثمان وزیر نے کہا کہ وائرل ہونے والی ویڈیو کسی کمرشل یا ڈرامے کی شوٹنگ کا حصہ نہیں بلکہ وہ حقیقت میں باکسنگ سیکھ رہی ہیں۔
یہ بھی پڑھیں: ہانیہ عامر کے گانے ’پابلو‘ پر تنقید، راکھی ساونت اداکارہ کے دفاع میں آگئیں
عثمان وزیر کے مطابق ہانیہ عامر کو باکسنگ میں خاص دلچسپی ہے اور وہ اس کی باقاعدہ تربیت حاصل کر رہی ہیں۔ انہوں نے مزید بتایا کہ اداکارہ کی پہلی باضابطہ فائٹ کے حوالے سے اعلان بھی جلد متوقع ہے۔
ہانیہ عامر کے اس نئے انداز نے مداحوں کو حیران کردیا ہے اور اب سب کی نظریں اس بات پر ہیں کہ اداکارہ کب پہلی مرتبہ باقاعدہ باکسنگ فائٹ کے لیے رنگ میں اترتی ہیں۔
