ایشین گیمز 2026 مینز ہاکی کے دوسرے سیمی فائنل میں بھارت نے روایتی حریف پاکستان کو ایک انتہائی سنسنی خیز مقابلے کے بعد 4-3 سے شکست دے کر فائنل کے لیے کوالیفائی کر لیا۔
یہ بھی پڑھیں: عبدالصمد کی دھواں دار اننگز، پاکستان ایشین گیمز کرکٹ کے فائنل میں پہنچ گیا
جمعرات کو کاواساکی جوکو اسٹیڈیم میں کھیلے گئے میچ میں بھارت نے جارحانہ آغاز کیا اور پہلے ہی کوارٹر میں کپتان ہرمن پریت سنگھ کے 2 گولوں کی بدولت 2-0 کی برتری حاصل کر لی۔
پاکستان کو اس کے بعد 4 پینلٹی کارنر ملے جن میں سے 3 پہلے کوارٹر میں اور ایک دوسرے کوارٹر کے شروع میں حاصل ہوئے لیکن قومی ٹیم اس سے فائدہ نہ اٹھا سکے۔ 23 ویں منٹ میں سکھ جیت سنگھ نے شاندار فیلڈ گول کر کے بھارت کی برتری 3-0 کر دی۔
پاکستان کی شاندار واپسی
دوسرے کوارٹر کے آخری لمحے میں ابو بکر محمود نے پینلٹی کارنر پر گول کر کے پاکستان کا کھاتہ کھولا اور اسکور 3-1 کر دیا۔
مزید پڑھیے: ایشین گیمز: پاکستان نے ہانگ کانگ کو شکست دے کر اسکواش فائنل میں جگہ بنالی
تیسرے کوارٹر میں حنان شاہد نے 45 ویں منٹ میں زبردست فیلڈ گول کر کے فرق صرف ایک گول کا کر دیا۔
چوتھے اور آخری کوارٹر میں پاکستان نے میچ میں واپسی مکمل کر لی، جب رانا وحید اشرف نے 49 ویں منٹ میں گول کر کے مقابلہ 3-3 سے برابر کر دیا۔
جب لگ رہا تھا کہ فیصلہ پینلٹی شوٹ آؤٹ پر ہوگا تو آخری منٹ میں ابھیشیک نے بھارت کے لیے فیصلہ کن گول کر کے اپنی ٹیم کو 4-3 سے فتح دلا دی۔
مزید پڑھیں: والی بال: پاکستان نے ایشین گیمز میں بھارت کو آؤٹ کلاس کردیا، سیمی فائنل میں رسائی
اس شکست کے بعد پاکستان اب کانسی کے تمغے کے لیے ملائیشیا اور جنوبی افریقہ کے درمیان ہونے والے میچ کے فاتح سے مقابلہ کرے گا۔
