.
.
پاکستان اور مملکتِ بحرین نے دوطرفہ سفارتی تعلقات کی 55 ویں سالگرہ کے موقع پر متعدد شعبوں میں باہمی تعاون کو مزید وسعت دینے اور مضبوط بنانے کے عزم کا اعادہ کیا ہے۔
نائب وزیراعظم و وزیر خارجہ سینیٹر محمد اسحاق ڈار نے اسلام آباد میں بحرین کے وزیر خارجہ ڈاکٹر عبد اللطیف بن راشد الزیانی اور ان کے وفد کے ہمراہ مشترکہ پریس کانفرنس کرتے ہوئے بتایا کہ اجلاس دوستانہ اور تعمیری ماحول میں منعقد ہوا، جو دونوں ممالک کے گہرے باہمی اعتماد اور برادرانہ تعلقات کی عکاسی کرتا ہے۔
یہ بھی پڑھیے پاکستان اور بحرین کا دوطرفہ تعاون و تجارت دوگنا کرنے پر اتفاق، مشترکہ وزارتی کمیشن کا تیسرا اجلاس کامیابی سے مکمل
انہوں نے اعلان کیا کہ مشترکہ وزارتی کمیشن کے فیصلے پر عملدرآمد کو یقینی بنانے کے لیے ایک ادارہ جاتی فریم ورک کے تحت متعدد ’جوائنٹ ورکنگ گروپس‘ کو فعال کر دیا گیا ہے۔
دونوں ممالک نے تجارت، سرمایہ کاری، صنعتی تعاون، زراعت، فوڈ سیکیورٹی، ہنرمندی کی ترقی (اسکلز ڈیولپمنٹ)، اعلیٰ تعلیم، انفارمیشن ٹیکنالوجی، لاجسٹکس اور بحری امور کے شعبوں میں تعاون بڑھانے پر اتفاق کیا ہے۔ اس کے علاوہ دونوں ممالک کی کاروباری برادری کے درمیان روابط مزید استوار کرنے پر بھی زور دیا گیا۔
پاکستانی برادری اور انسانی وسائل کا فروغ
اسحاق ڈار نے بحرین میں مقیم پاکستانی کمیونٹی کی خدمات کو سراہتے ہوئے انہیں دونوں ممالک کے درمیان ایک مضبوط پل قرار دیا۔ انہوں نے بتایا کہ دونوں برادر ممالک نے پاکستانی ہنرمندوں اور پیشہ ور افراد کے لیے نئے مواقع پیدا کرنے کے لیے لیبر موبیلٹی، فنی تربیت اور انسانی وسائل کی ترقی (ہیومن ریسورس ڈیولپمنٹ) میں تعاون بڑھانے پر اتفاق کیا ہے۔
علاقائی صورتحال اور عالمی امور
خلیج اور مشرق وسطیٰ کی بدلتی ہوئی صورتحال پر بات کرتے ہوئے انہوں نے کشیدگی میں کمی، تحمل، مذاکرات اور سفارت کاری کی ضرورت پر زور دیا۔ انہوں نے آبنائے ہرمز اور باب المندب کو عالمی غذائی اور توانائی کی سلامتی کے لیے اہم قرار دیتے ہوئے ان بحری راہداریوں میں آزادانہ اور محفوظ آمدورفت کو یقینی بنانے کی اہمیت پر روشنی ڈالی۔
🔊 PR No. 2️⃣8️⃣ 3️⃣/2️⃣0️⃣2️⃣6️⃣
Remarks by Deputy Prime Minister/Foreign Minister Senator Mohammad Ishaq Dar @MIshaqDar50 during Joint Press Stakeout with the Foreign Minister of the Kingdom of Bahrain, H.E. Dr. Abdullatif bin Rashid Al Zayani. (8 October 2026)
🔗⬇️ https://t.co/eVS0PAY0UJ
— Ministry of Foreign Affairs – Pakistan (@ForeignOfficePk) October 8, 2026
فلسطین کے مسئلے پر پاکستان نے اپنے اصولی موقف کا اعادہ کرتے ہوئے غزہ کے مظلوم عوام تک فوری اور بلا رکاوٹ انسانی امداد کی فراہمی اور اقوام متحدہ کی قراردادوں کے مطابق منصفانہ حل کا مطالبہ کیا۔ اس کے علاوہ القدس الشریف کی قانونی و تاریخی حیثیت کو تبدیل کرنے اور غیر قانونی اسرائیلی بستیوں کی توسیع پر گہری تشویش کا اظہار کیا گیا۔
جنوبی ایشیا اور سندھ طاس معاہدہ
اجلاس کے دوران جنوبی ایشیا کی صورتحال بشمول افغانستان اور سندھ طاس معاہدے پر بھی تبادلہ خیال ہوا۔ نائب وزیراعظم نے اس بات پر زور دیا کہ افغان سرزمین کا پاکستان کے خلاف استعمال نہ ہونا یقینی بنایا جائے۔
یہ بھی پڑھیے بحرینی وزیر خارجہ عبداللطیف بن راشد الزایانی پاکستان پہنچ گئے، ایئر پورٹ پر شاندار استقبال
سندھ طاس معاہدے سے متعلق گفتگو کرتے ہوئے اسحاق ڈار نے واضح کیا کہ بھارت کی جانب سے معاہدے کو یکطرفہ طور پر معطل (ابینس) کرنا بین الاقوامی قوانین کی سنگین خلاف ورزی ہے۔ انہوں نے متنبہ کیا کہ مشترکہ آبی وسائل کو ہتھیار بنانے کی یہ خطرناک کوشش پاکستان کے 25 کروڑ عوام کی پانی، خوراک اور توانائی کی سلامتی کے لیے شدید خطرہ ہے۔
نائب وزیراعظم نے بحرینی وفد کا شکریہ ادا کرتے ہوئے بتایا کہ مشترکہ وزارتی کمیشن کا چوتھا اجلاس مملکتِ بحرین میں منعقد ہوگا۔
