پاکستانی روپےکی مضبوطی کا سفر سست رو لیکن مستقل جاری

انٹربینک فارن ایکسچینج مارکیٹ میں جمعرات کے روز بھی امریکی ڈالر کے مقابلے میں پاکستانی روپے کی قدر میں بہتری کا سلسلہ جاری رہا۔ مقامی کرنسی میں 0.01 فیصد اضافہ ریکارڈ کیا گیا۔

یہ بھی پڑھیں: خراماں خراماں: روپے کی قدر مسلسل مضبوطی کی سمت گامزن، جانیے یہ سلسلہ کب سے جاری ہے؟

اس صورتحال کے بعد انٹربینک میں ڈالر 276.95 روپے سے کم ہو کر 276.92 روپے کی سطح پر بند ہوا اس کا مطلب ہے کہ مقامی کرنسی میں 3 پیسے کا اضافہ دیکھا گیا۔ یاد رہے کہ بدھ کے روز پاکستانی روپیا ڈالر کے مقابلے میں 276.95 پر بند ہوا تھا۔

عالمی مارکیٹ اور شرح سود کی صورتحال

بین الاقوامی سطح پر جمعرات کے روز مہنگائی کے اعداد و شمار توقع سے زیادہ گرم آنے کے باوجود امریکی ڈالر 18 ماہ کی بلند ترین سطح سے نیچے آ گیا۔

فیڈرل ریزرو کے حکام کی محتاط آرا اور ٹریژری ییلڈز میں کمی کی وجہ سے تاجروں نے اکتوبر میں شرح سود میں اضافے کی توقعات کو کم کر دیا ہے۔

ڈالر کے مقابلے میں یورو 18 ماہ کی کم ترین سطح سے 0.3 فیصد اچھل کر 1.1187 ڈالر پر ٹریڈ کرنے لگا جبکہ برطانوی پاؤنڈ بھی 13 ماہ کی کم ترین سطح سے بحال ہو کر 0.2 فیصد اضافے کے ساتھ 1.3224 ڈالر پر پہنچ گیا۔

کرنسیوں کی ٹوکری کے مقابلے میں ڈالر کی قدر کا پیمانہ ‘ڈالر انڈیکس’ 0.1 فیصد کمی کے ساتھ 102.06 پر آ گیا۔

مزید پڑھیے: ’ایک پیسہ بھی بہت ہے‘: امریکی ڈالر کے مقابلے میں پاکستانی روپے کی قدر میں اضافہ جاری

امریکی محکمہ محنت کے جاری کردہ ڈیٹا کے مطابق ستمبر میں کور کنزیومر پرائس انڈیکس (CPI) میں ماہانہ بنیادوں پر 0.3 فیصد اضافہ ہوان جبکہ ماہرین کی توقع 0.2 فیصد اضافے کی تھی۔

سالانہ بنیادوں پر یہ شرح 2.6 فیصد رہی جو کہ 2.5 فیصد کی پیشگوئی سے زیادہ ہے جبکہ ہیڈلائن ریٹ بھی 3.7 فیصد رہا جو کہ 3.6 فیصد کے تخمینے سے زیادہ ہے۔

اس ڈیٹا کے آنے کے بعد اکتوبر میں فیڈ کی جانب سے شرح سود میں اضافے کی مارکیٹ پرائسنگ تیزی سے بڑھ کر 50 فیصد تک پہنچ گئی جس سے گرین بیک کو ایک لمحاتی تقویت ملی تھی۔

آسٹریلوی ڈالر 0.3 فیصد کمی کے ساتھ 0.6952 ڈالر پر آ گیا جبکہ جاپانی ین 0.3 فیصد اضافے کے ساتھ 157.82 پر رہا۔