پاکستان سمیت 19 ممالک نے کولمبیا کی جانب سے مقبوضہ یروشلم میں سفارت خانہ کھولنے کے اقدام کی شدید مذمت کرتے ہوئے اسے اقوام متحدہ کی سلامتی کونسل کی متعلقہ قراردادوں کے منافی قرار دیا ہے۔
دفتر خارجہ کے مطابق پاکستان، مصر، فلسطین، ترکیہ، سعودی عرب، قطر، اردن، انڈونیشیا، ملائیشیا، الجزائر، عمان، کویت، لبنان، لیبیا، جبوتی، صومالیہ، شام، سوڈان اور یمن کے وزرائے خارجہ نے مشترکہ بیان میں کولمبیا کے اس فیصلے کو مسترد کیا ہے۔
🔊PR No.2️⃣9️⃣0️⃣/2️⃣0️⃣2️⃣6️⃣
Joint Statement by the Foreign Ministers of the Islamic Republic of Pakistan, Algeria, Djibouti, Egypt, Indonesia, Jordan, Kuwait, Lebanon, Libya, Malaysia, Oman, Palestine, Qatar, Saudi Arabia, Somalia, Syria, Sudan and Türkiye
🔗⬇️ pic.twitter.com/DEkSfSUmsE
— Ministry of Foreign Affairs – Pakistan (@ForeignOfficePk) October 16, 2026
مشترکہ بیان میں کہا گیا ہے کہ مقبوضہ یروشلم کی قانونی یا تاریخی حیثیت تبدیل کرنے یا اسے اسرائیل کا دارالحکومت تسلیم کرنے کا کوئی بھی اقدام غیر قانونی اور بے اثر ہے۔ یہ مؤقف اقوام متحدہ کی سلامتی کونسل کی قراردادوں 476 اور 478 کے مطابق ہے، جو یروشلم کی حیثیت تبدیل کرنے کی کوششوں کو مسترد کرتی ہیں اور ممالک سے شہر میں قائم سفارتی مشنز واپس بلانے کا مطالبہ کرتی ہیں۔
وزرائے خارجہ نے کولمبیا کی حکومت پر زور دیا کہ وہ اپنے فیصلے پر نظرثانی کرتے ہوئے اسے واپس لے اور بین الاقوامی قانون کے تحت اپنی ذمہ داریاں پوری کرے۔
یہ بھی پڑھیں:برطانوی پابندیوں پر اسرائیل کا ردعمل، مشرقی یروشلم میں قونصل خانہ بند کرنے کا حکم
بیان میں کہا گیا کہ ایسے اقدامات سے فلسطینی عوام کے جائز حقوق متاثر نہیں ہونے چاہییں، جن میں مشرقی یروشلم کو دارالحکومت بنا کر ایک آزاد اور خودمختار فلسطینی ریاست کا قیام بھی شامل ہے۔
