بالی وڈ اداکارہ ایشوریا رائے طویل عرصے سے بڑی اسکرین پر نظر نہیں آئیں، تاہم حال ہی میں ایک نجی خاندانی تقریب میں شرکت کے باعث وہ ایک بار پھر مداحوں کی توجہ کا مرکز بن گئیں۔
اداکارہ اپنی بیٹی آرادھیا بچن کے ہمراہ اپنے بھتیجے شوانش رائے کی سالگرہ کی تقریب میں شریک ہوئیں۔
شوانش، ایشوریا رائے کے بھائی آدتیہ رائے اور ان کی اہلیہ شریما رائے کے بیٹے ہیں، اس موقع پر ایشوریا کی والدہ برندا رائے اور آدتیہ کے بڑے بیٹے ویہان رائے بھی موجود تھے۔
یہ بھی پڑھیں: کیا ایشوریہ رائے کی بیٹی ارادھیا بچن بالی ووڈ میں ڈیبیو کرنے جارہی ہیں؟
سالگرہ کی تقریب کی تصاویر سوشل میڈیا پر سامنے آتے ہی وائرل ہوگئیں، جہاں مداحوں نے شوانش کو سالگرہ کی مبارک باد دی اور ایشوریا رائے کے انداز کو بھی سراہا۔
تقریب کے لیے ایشوریا رائے اور آرادھیا بچن نے ایک جیسے ڈینم لباس کا انتخاب کیا، دونوں نے خاندان کے دیگر افراد کے ساتھ تصاویر بنوائیں۔
ماں اور بیٹی کو ایک نجی خاندانی تقریب میں ایک ساتھ دیکھ کر مداحوں نے خوشی کا اظہار کیا۔
#AishwaryaRai , daughter #Aaradhya twin in blue for family gathering. See picshttps://t.co/IeLEy5dR9p
— SCREEN (@ieEntertainment) October 24, 2026
شریما رائے نے بھی انسٹاگرام پر شوانش کی سالگرہ کے موقع پر چند یادگار تصاویر شیئر کیں، ایک تصویر میں خاندان کے افراد سالگرہ کا کیک کاٹتے دکھائی دیے، جبکہ دوسری تصویر میں تمام افراد ایک ساتھ پوز دیتے نظر آئے۔
اپنے بیٹے کو سالگرہ کی مبارکباد دیتے ہوئے، شریما رائے نے تصاویر کے ساتھ اپنے پیغام میں لکھا کہ دعا ہے کہ زندگی میں مزید شرارتیں، فطرت کے ساتھ زیادہ وقت، ڈھیروں قہقہے اور برکتیں نصیب ہوں۔ ’مجھے تم پر بہت فخر ہے۔‘
یہ خاندانی تقریب ایسے وقت میں منعقد ہوئی ہے جب اس سے قبل اگست میں شریما رائے نے رکشا بندھن کی تقریبات کی تصاویر بھی شیئر کی تھیں۔
مزید پڑھیں: ایشوریا رائے کا یوٹیوب اور گوگل کیخلاف ہرجانے کا دعویٰ، سینکڑوں اے آئی ویڈیوز ہٹادی گئیں
ان تصاویر میں ایشوریا رائے اپنی والدہ، بھائی، بھابھی اور بچوں کے ساتھ تہوار مناتی دکھائی دی تھیں، ان میں ایشوریا کی بیٹی آرادھیا بھی شامل تھیں۔
دوسری جانب، ایشوریا رائے حال ہی میں پیرس فیشن ویک میں ریمپ پر جلوہ گر ہوئی تھیں، اس سے قبل وہ کانز فلم فیسٹیول میں بھی اپنی سالانہ شرکت کے باعث خبروں میں رہی تھیں۔
فلمی مصروفیات کی بات کی جائے تو ایشوریا رائے آخری مرتبہ منی رتنم کی فلم پونین سیلوان 2 میں نظر آئی تھیں، اداکارہ نے تاحال اپنے اگلے فلمی منصوبے کا اعلان نہیں کیا۔
اداکارہ کی جانب سے کسی نئی فلم کا اعلان نہ ہونے کے باوجود ان کی نجی زندگی اور خاندانی تقریبات مداحوں کی دلچسپی کا باعث بنی ہوئی ہیں۔
