پاک بحریہ کے لیے بنائے جانے والے ٹائپ 054 ایلفا فری گیٹس پی این ایس شاہجہاں اور ٹیپو سلطان کی شمولیت کی تقریب کراچی میں منعقد ہوئی۔
جمعرات کو جاری اعلامیے کے مطابق تقریب کے مہمان خصوصی وفاقی وزیر دفاع خواجہ محمد آصف تھے۔ کراچی ڈاکیارڈ آمد پر چیف آف دی نیول اسٹاف ایڈمرل محمد امجد خان نیازی نے وفاقی وزیر دفاع کا استقبال کیا۔
بحری جہازوں میں جدید ترین ہتھیار اور سینسرز نصب ہیں جو کثیر خطرات کے ماحول میں آپریشن کرنے کی صلاحیت رکھتے ہیں۔ ان جہازوں کے بحری بیڑے میں شمولیت سے پاک بحریہ کی جنگی تیاری میں نمایاں اضافہ ہوگا۔
اس موقع پر خطاب کرتے ہوئے وزیر دفاع خواجہ محمد آصف نے پاکستان کے سمندری دفاع کو یقینی بنانے اور خطے میں امن واستحکام کو فروغ دینے میں پاک بحریہ کی کاوشوں کو سراہا۔ وفاقی وزیر برائے دفاع نیخطے کی جیو اسٹریٹجک اور جیو اکنامک اہمیت پر زور دیتے ہوئے کہا کہ بحری سرحدوں کی حفاظت کے لیے ایک طاقتور نیول فورس کی ضرورت ہے اور ان جدید بحری جہازوں کی شمولیت سے پاکستان کی دفاعی صلاحیتوں میں نمایاں اضافہ ہوگا۔
انہوں نے پاکستان کے لیے بحری جہازوں کی بروقت تعمیر اور ترسیل پر ہوڈونگ ڑونگھوا شپ یارڈ چین کا بھی شکریہ ادا کیا۔
قبل ازیں چیف آف دی نیول اسٹاف ایڈمرل محمد امجد خان نیازی نے استقبالیہ خطاب کے دوران جدید بحری جہازوں کی پی این فلیٹ میں شمولیت کو ایک اہم سنگ میل قرار دیا۔
انہوں نے پاک بحریہ کو جدید بحری فوج بنانے کے لیے حکومت پاکستان کی حمایت کو سراہا۔ تقریب میں پاکستان کے سول، عسکری اور حکومتی نمائندوں سمیت چین کے ہوڈونگ ڑونگھوا شپ یارڈ کے حکام نے شرکت کی۔
