ایشیا کپ کا کل سے آغاز: بابر اعظم جیت کا تسلسل برقرار رکھنے کے لیے پرعزم

پاکستان کرکٹ ٹیم کے کپتان بابر اعظم نے کہا ہے کہ پورا ایشیا کپ پاکستان میں ہوتا تو زیادہ خوشی ہوتی، ایشیا کپ میں جیت کے تسلسل کو برقرار رکھنے کی کوشش کریں گے۔

ملتان میں پریس کانفرنس کرتے ہوئے قومی ٹیم کے کپتان نے کہاکہ افغانستان کے خلاف ون ڈے سیریز اچھی رہی، دونوں ملکوں کےدرمیان میچ ہمیشہ ہی اہم ہوتا ہے۔

بابر اعظم نے کہاکہ ہم کسی بھی حریف ٹیم کو آسان نہیں لیں گے، ہمارا فوکس گیم پر رہا اسی وجہ سے عالمی نمبر ون بننے میں کامیاب ہوئے۔

ان کا کہنا تھا کہ پاکستان اور بھارت کا میچ ہمیشہ ہی اہم ہوتا ہے۔ قومی کپتان نے کہاکہ ٹریولنگ شیڈول ایسا بنایا ہے کہ آرام بھی مل رہا ہے، سینٹرل کنٹریکٹ پر جلد اچھی خبر ملے گی، تمام تر مسائل کے باوجود فوکس کرکٹ پر رہا ہے۔

واضح رہے کہ ایشیا کپ کا آغاز کل سے ملتان میں ہو رہا ہے، پہلے میچ میں پاکستان اور نیپال کی کرکٹ ٹیمیں آمنے سامنے ہوں گی۔