پشاور کے علاقے تھانہ خزانہ کی حدود شاہ عالم میں 7 سالہ بچی اور ضلع کرک کے علاقے صابر آباد میں 7 سالہ بچے کو قتل کر دیا گیا۔
پشاور پولیس کے مطابق پشاور کے علاقے تھانہ خزانہ کی حدود شاہ عالم سے فضل شیر نامی شہری کی6 یا 7 سالہ بیٹی کی نعش برآمد ہوئی ہے، بچی کو نامعلوم افراد نے نامعلوم وجوہات کی بنا پر قتل کیا، پولیس نے نعش کو تحویل میں لے کر پوسٹ مارٹم کے لیے اسپتال منتقل کر دیا۔
مزید پڑھیں
پشاور پولیس نے بتایا کہ بچی کے چچا صابر کی مدعیت میں ملزمان کے خلاف مقدمہ درج کرلیا گیا ہے اور قتل کی اصل وجوہات معلوم کرنے کے لیے تحقیقات جاری ہیں۔
دوسری جانب خیبر پختونخوا کے ضلع کرک کے علاقے صابر آباد کے نواحی علاقے سرٹ خیل میں ایک 7 سالہ بچے کو ذبح کیے جانے کا انکشاف ہوا ہے۔
ریسکیو 1122 کے مطابق کرک صابر آباد کے علاقے سرٹ خیل میں 7سالہ بچے کے ذبح ہونے کی اطلاع موصول ہوئی، جس کے بعد ریسکیو کے اہلکاروں نے بچے کے موقع پر جا کر بچے کی نعش کو پوسٹ مارٹم رپورٹ کے لیے ڈسٹرکٹ ہیڈ کواٹر اسپتال کرک منتقل کر دیا۔
ذبح کیے گئے بچے کی شناخت واجد ولد عزت گل کے نام سے ہوئی ہے جو افغانستان کا شہری ہے اور سرٹ خیل میں اپنے خاندان کے ہمراہ رہائش پذیر تھا۔
