آفیشل سیکرٹ ایکٹ خصوصی عدالت سے عمران خان اور شاہ محمود قریشی کی ضمانت کی درخواستوں پر سماعت 7 ستمبر تک ملتوی کر دی گئی ہے۔
آفیشل سیکرٹ ایکٹ کے تحت سابق وزیر اعظم عمران خان کا سائفر کیس میں ٹرائل کے لیے تشکیل کردہ خصوصی عدالت کے جج ابوالحسنات ذوالقرنین اچانک ایسے وقت رخصت پر چلے گئے ہیں جب انہیں 3 درخواستوں پر سماعت کرنا تھی۔
اٹک جیل میں گرفتار عمران خان کی جانب سے سائفر کیس میں ضمانت، جیل میں ٹرائل کا نوٹیفیکیشن کالعدم قرار دینے اور کھلی عدالت میں مقدمہ کی سماعت کرنے کی درخواستیں آج سماعت کے لیے مقرر تھیں، تاہم عمران خان کی قانونی ٹیم نے متعلقہ جج کی غیرموجودگی میں سینئر جج جواد عباس راجہ کے سامنے پیش ہونے کا فیصلہ کیا تھا۔
ڈیوٹی جج راجہ جواد عباس نے اپنی عدالت میں دائر نئی درخواست ضمانت کے قابل سماعت ہونے کا فیصلہ موخر کرتے ہوئے 12 بجے دلائل طلب کرتے ہوئے ایف آئی اے کو بھی عدالت طلب کرلیا تھا۔
وقفے کے بعد کیس کی دوبارہ سماعت کے دوران ڈیوٹی جج راجہ جواد عباس نے ریمارکس دیے کہ یہاں پر درخواست دائر کرتے ہیں اور پھر وہاں جاکر خود دن مقرر کرتے ہیں، اس موقع پر ایف آئی اے پروسیکوشن ٹیم بھی عدالت کے روبرو پیش ہوئی۔ ایف آئی اے کے اسپیشل پروسیکیوٹر کا موقف تھا کہ سادہ کاغذ پر لکھی گئی درخواست کی کوئی اہمیت نہیں۔
پی ٹی آئی کی وکلا پر مشتمل قانونی ٹیم نے سینئر جج راجہ جوادعباس کی عدالت میں دائر درخواست واپس لےلی، جس کے بعد عدالتی عملہ نے سائفرکیس کی جمعرات تک ملتوی سماعت کے حوالے سے جج راجہ جوادعباس کو آگاہ کردیا۔ سائفرکیس کی سماعت 7 ستمبر تک ملتوی کردی گئی ہے۔
