ماہ ستمبر پاکستانی روپے کے لیے بہترین رہا اور اکتوبر کے پہلے کاروباری ہفتے کے پہلے روز بھی ڈالر کے مقابلے میں روپے کی قدر میں بہتری کا سلسلہ جاری ہے۔
انٹر بینک میں امریکی ڈالر99 پیسے سستا ہونے کے بعد 287.74 روپے سے بھی نیچے آ گیا، ڈالر کی قیمت 286.75 روپے ہو گئی جب کہ اوپن مارکیٹ میں ڈالر 1 روپے 50 پیسے کی کمی کے ساتھ 286 روپے 50 پیسے پر فروخت ہو رہا ہے۔
مزید پڑھیں
پاکستان اسٹاک ایکسچینج میں بھی مثبت رجحان دیکھا گیا ہے۔پاکستان سٹاک مارکیٹ 394 پوائنٹس کے اضافہ کے ساتھ 100 انڈیکس 46 ہزار 627 پوائنٹس پر بند ہوئی ۔
معاشی ماہر شہریار بٹ نے وی نیوز کو بتایا کہ پاکستان اسٹاک ایکسچینج کے کاروباری ہفتے کا آغاز مثبت انداز میں ہوا، 394 پوائنٹس کے اضافے کے ساتھ کے ای ایس سی انڈکس 46627 پر بند ہوا جب کہ اس دوران 201 ملین شئیرز ٹریڈ ہوئے۔
پیر کو مارکیٹ سارا دن مثبت انداز میں آگے بڑھتی رہی، سب سے زیادہ آئل اینڈ گیس کے شیئرز میں بہتری دیکھی گئی، اس کے بعد ٹیکنالوجی میں بھی بہتری دیکھی گئی۔ او جی ڈی سی ایل اب تک 24 ارب کا منافع کما چکی ہے۔
شہریار بٹ کے مطابق روس سے تیل کی مصنوعات درآمد کی جارہی ہیں اس خبر نے بھی مارکیٹ میں مثبت اثرات ڈالے ہیں۔ ڈالر مسلسل 18 ویں روز سے گرتا چلا جا رہا ہے اور پیر کو بھی روپے کے مقابلے میں ڈالر کی قدر میں گراوٹ ریکارڈ کی گئی ہے۔
ایکسچینج کمپنیز ایسوسی ایشن کے سیکریٹری جنرل ظفر سلطان پراچہ نے وی نیوز کو بتایا کےہماری ایمپورٹ میں کمی جبکہ ایکسپورٹ میں اضافہ دیکھنے میں آیا ہے اس صورت حال میں ریمٹینس بڑھنے کے امکانات ہیں جبکہ کرنٹ اکاونٹ ڈیفیسڈ کے نمبروں میں بہتری دیکھائی دے رہی ہے۔
بجلی کی قیمتوں اور پیٹرول کی قیمتوں میں اضافے کے باعث مہنگائی بڑھتی دیکھائی دے رہی تھی تاہم اگر بجلی اور تیل کی قیمتوں میں کمی ہونا شروع ہو جائے تو اس کے براہ راست اثرات عوام پر پڑیں گے۔
