آرمی چیف جنرل عاصم منیر نے غزہ پر اسرائیلی حملوں کی مذمت کرتے ہوئے کہا ہے کہ غزہ سے فلسطینیوں کا جبری انخلا انسانیت کے خلاف جرائم کا عکاس ہے۔
پاک فوج کے شعبہ تعلقات عامہ (آئی ایس پی آر) کی جاری کردہ ایک پریس ریلیز کے مطابق آرمی چیف جنرل سید عاصم منیر نے پاکستان میں فلسطین کے سفیر احمد جواد ربیع سے ملاقات کی اور غزہ میں جاری جنگ میں فلسطینیوں شہریوں کی جانوں کے ضیاع پر تعزیت کا اظہار کیا۔
آرمی چیف نے جنگ میں اسرائیلی فوج کے ہاتھوں بے گناہ شہریوں پر تشدد اور اندھا دھند ہلاکتوں پر گہری تشویش کا اظہار کرتے ہوئے کہا کہ اسرائیلی فوج کی جانب سے شہری آبادی، اسکولوں، جامعات، امدادی کارکنوں اور اسپتالوں پر مسلسل حملے قابل مذمت ہیں اور غزہ سے فلسطینیوں کا جبری انخلا انسانیت کے خلاف جرائم کا عکاس ہے۔
مزید پڑھیں
آرمی چیف نے 1967ء سے پہلے کی سرحدوں کی بنیاد پر قائم ہونے والی آزاد ریاست فلسطین کے لیے پاکستان کی اصولی حمایت کا اعادہ کیا اور کہا کہ فلسطین کا دارالحکومت القدس الشریف ہے، غزہ میں تشدد کی تازہ لہر جبر، انسانی حقوق کی مسلسل خلاف ورزیوں اور ریاستی سرپرستی میں مسجد اقصیٰ کی بے حرمتی کا نتیجہ ہے، اس جنگ کو دہشت گردی سے جوڑنا نادانی ہوگی، تنگ نظری اور خود غرضانہ نظریہ اختیار کرتے ہوئے اس معاملے کو ایک الگ تھلگ حملے کے طور پر دیکھنا کئی دہائیوں پر محیط وحشیانہ جبر کو دھندلا دیتا ہے جس کا نتیجہ اس جنگ کی صورت میں سامنے آیا ہے۔
آرمی چیف نے کہا کہ اس نازک موڑ پر یہ ضروری ہے کہ عالمی برادری اسرائیلی فوج کی طرف سے طاقت کے غیر متناسب اور غیر قانونی استعمال کی وجہ سے رونما ہونے والے انسانی المیے کو جلد از جلد ختم کرنے کے لیے متحرک ہو اور انسانی حقوق و شہری اقدار کی خلاف ورزی کرتے ہوئے مظالم جاری رکھنے میں اسرائیلی فوج کی حوصلہ افزائی سے باز رہے۔
