پاکستان نے واضح کیا ہے کہ غیر قانونی طور پر ملک میں مقیم غیرملکیوں کی وطن واپسی کا منصوبہ تمام غیر قانونی غیر ملکیوں پر لاگو ہوتا ہے، تاہم ملک بھر میں قانونی طور پر مقیم اور رجسٹرڈ تمام غیر ملکی شہری اس منصوبے کے دائرہ کار سے باہر ہیں۔
میڈیا کی جانب سے اس ضمن میں سوالات کا جواب دیتے ہوئے ترجمان وزارت خارجہ ممتاز زہرا بلوچ کا کہنا ہے کہ انہوں نے اقوام متحدہ کے ہائی کمشنر برائے انسانی حقوق کے دفتر کا پریس بیان دیکھا ہے، غیر قانونی طور پر قیام پذیر غیر ملکیوں کی وطن واپسی کا منصوبہ پاکستان میں مقیم تمام غیر قانونی غیر ملکیوں پر، ان کی قومیت سے قطع نظر، لاگو ہوتا ہے۔
’یہ فیصلہ پاکستان کے خودمختار ملکی قوانین کے مطابق ہے، اور قابل اطلاق بین الاقوامی اصولوں اور اصولوں کے مطابق ہے، پاکستان میں قانونی طور پر مقیم اور رجسٹرڈ تمام غیر ملکی شہری اس پلان کے دائرہ کار سے باہر ہیں۔‘
ترجمان دفتر خارجہ کے مطابق حکومت پاکستان انتہائی سنجیدگی کے ساتھ کمزور حالات میں ان لوگوں کے تحفظ اور حفاظت کی ضروریات کے حوالے سے اپنے وعدوں کو پورا کررہی ہے، ہمارے لاکھوں افغان بھائیوں اور بہنوں کی میزبانی کا ہمارا گزشتہ چالیس سالہ ریکارڈ اس کا منہ بولتا ثبوت ہے۔
انہوں نے بین الاقوامی برادری کو ترجیحی طور پر پائیدار حل کو آگے بڑھانے کے ذریعے طویل عرصے سے پناہ گزینوں کے حالات سے نمٹنے کے لیے اجتماعی کوششوں کو تیز کرنے پر زور دیتے ہوئے کہا کہ پاکستان اس مقصد کے لیے اپنے بین الاقوامی شراکت داروں کے ساتھ تعاون جاری رکھے گا۔
