وزارت انفارمیشن ٹیکنالوجی و ٹیلی کمیونیکیشن نے پاکستان ٹیلی کمیونیکیشن اتھارٹی (پی ٹی اے) کے لیے پالیسی ڈائریکٹیو جاری کرنے کی ہدایت کردی ہے۔ نگراں وزیر سائنس و ٹیکنالوجی ڈاکٹر عمر سیف نے کہا کہ عام لوگوں تک سیل فونز پہنچانے کے لیے سیلولر آپریٹرز، سرمایہ کار کمپنیاں اور بینکس جلد قسطوں پر اسمارٹ فونز کے پیکجز کا بھی اعلان کریں۔
نگراں وزیر سائنس و ٹیکنالوجی ڈاکٹر عمر سیف کی زیر صدارت اعلیٰ سطح اجلاس ہوا جس میں حکومت پاکستان کی جانب سے آئی ٹی سروس اور پالیسی ڈائریکٹیو جاری کرنے کے لیے اہم اقدامات اٹھانے کا فیصلہ کیا گیا ہے۔ اجلاس میں فیصلہ کیا گیا کہ آئی ٹی سروسز میں اضافہ کرنے کے لیے اسمارٹ فونز کو عام لوگوں تک پہنچانا بہت ضروری ہے۔
مزید پڑھیں
نگراں وزیر برائے سائنس و ٹیکنالوجی نے پی ٹی اے کے لیے پالیسی ڈائریکٹیو جاری کرنے کی ہدایت کردی ہے، انہوں نے کہا کہ عوام کو سہولیات کی فراہمی اولین ترجیح ہے اس کے لیے پالیسی بنائی ہے جس کے تحت تمام ڈیفالٹرز کے فون بلاک کیے جائیں گے۔
ڈاکٹر عمر سیف نے کہا کہ نادہندگان کے لیے اس سے اگلا قدم سم اور بعد ازاں قومی شناختی کارڈ بلاکنگ ہوسکتا ہے، اس اقدام سے نادہنگان کی حوصلہ شکنی اوراسمارٹ فونز کے استعمال کا تناسب بڑھے گا۔ طلب میں اضافے سے موبائل فونز مینوفیکچررز انڈسٹری اور ملکی معیشت کو فائدہ پہنچے گا۔
انہوں نے کہا کہ دور دراز کے رہائشی افراد کے لیے بھی فون لینے کی رسائی آسان اور سیلولر آپریٹرز کے لیے بزنس کیسز بھی بنیں گے۔ ڈیجیٹل ورلڈ سے خود کو منسلک کرنے، ای کامرس کے فروغ کے لیے اسمارٹ فونز فار آل پالیسی ضروری ہے۔
نگراں وزیر آئی ٹی و ٹیلی کمیونیکیشن کا کہنا تھا کہ کسی بھی بڑے فیصلے سے پہلے کئی طرح کی رکاوٹوں کا سامنا کرنا پڑتا ہے لیکن تاریخ ان ہی افراد کو یاد رکھتی ہے جو رکاوٹوں کے باوجود ملک و قوم کے لیے بڑا کام کرتے ہیں۔
ان کا مزید کہنا تھا کہ افریقی ملک روانڈا کے اعلیٰ سطح وفد سے ملاقات میں بھی اسمارٹ فونز ایکسپورٹ کرنے سے متعلق اہم پیش رفت ہوئی ہے، پاکستانی اسمارٹ فونز میں روانڈا حکومت نے خصوصی دلچسپی ظاہر کی ہے۔
